Kryeministri Rama ndodhet në Gjirokastër, ku po mban një takim me votuesit.
Gjatë fjalës së tij, Rama ironizoi protestën që pritet të mbahet të hënën nga opozita, ndërsa u bëri thirrje të rinjve që të votojnë.
Gjithashtu, Rama kërkoi votën e të gjithë atyre që kanë rënë pre e kriminelëve, si një mënyrë për të “grushtuar” gjyqtarët dhe prokurorët e korruptuar.
Fjala e Ramës në Gjirokastër:
“Ata që sot janë në çadër kanë frikë nga drejtësia, ne jemi këtu për të mos lejuar që të përsëritet 1997-a. Ne nuk do të tërhiqemi para asnjë çadre dhe para asnjë proteste.
Në 18 qershor vendoset Shqipëria e së ardhmes. Evropa do një Shqipëri të zhvilluar.
Për të prishur punë kemi Saliun, murin që ndan vendin nga e ardhmja është padrejtësia. Shqiptarët duan të shembin këtë padrejtësi.
Në 3 vjet e gjysmë, ne kemi bërë sa kemi mundur. Kemi provuar që kush u bind për 20 e ca vite që Shqipëria nuk bëhet, duhet të rishikojë bindjen e tij. Ne kemi provuar që Shqipëria bëhet.
Ne provuam që matura shtetërore nuk ishte e destinuar të mbetet gjithë jetën një maturë e kopjuar.
Ne provuam se Shqipëria nuk mund të jetë vendi ku zhduken zanatet dhe të gjithë janë juristë.
Unë u them të gjithë të rinjve, që jo të gjithë do të shkojnë në universitet, por do kenë mundësi të marrin një zanat të denjë, të punojë e të fitojë. Jo vetëm kaq, por edhe të hapi biznesin e vet të vogël, të punësoje dhe të jetë i vetëpunësuar.
Më thoni kush mund t’i bëjë tjetër këto?! Askush tjetër, përveç Partisë Socialiste.
Kemi numrin më të madh të juristëve në botë, dhe kemi shtetin më të korruptuar. Jemi bërë gaz i botës me këto gjykata. Me këto gjykata që marrin pronën e gjyshit tënd, dhe ia japin dikujt që s’ka lidhje me gjyshin tënd.
Për ju që thoni se të gjithë njësoj janë dhe s’ka vlerë të votohet.
Po të ishim njësoj, edhe Gjirokastra do ishte njësoj. Është njësoj Gjirokastra si tre vjet më parë?
Vota e 18 qershorit ka brenda mundësinë për të marrë hak për të gjithë gjyshërit që u grabitën në pronat e tyre. Për të gjithë ato nëna që u veshën me të zeza nga humbja e bijëve që ranë pre e kriminelëve.
Për të marrë hak për të gjitha ato vajza që ranë pre e përdhunimeve. Vota e 18 qershorit ka brenda këtë hak dhe secili dhe secila duhet të kuptojë që çështja nuk është sa vota do marrë PS-ja në zgjedhjet e 18 qershorit, çështja është se sa grushta do marrin gjykatësit dhe prokurorët e korruptuar”. / Tirana Today
