Kryeministri Edi Rama ka theksuar se në ditët në vijim të qeverisjes së tij, administrata do të pastrohet nga korrupsioni dhe abuzimi në çdo nivel të saj. Në fjalën e tij në punimet e Asamblesë Kombëtare të Partisë Socialiste, Rama vuri në dukje se në 100 ditët e para të qeverisjes dhe në vazhdim do të goditen bandat që po terrorizojnë qytetarët dhe se do të çrrënjësohet fenomeni i kanabisit.
Pastrimi i administratës
Rama: Sot u përqendruam tek 100 ditët e para. Në këto 100 ditë ne përcaktojmë edhe fizionominë e qeverisjes si dhe tonin e bashkëqeverisjes me njëri-tjetrin. Për të bërë një përmbledhje, në këtë fazë të parë të mandatit tonë na duhet pastrim në të gjitha nivelet e administratës nga keqbërësit dhe fillimi i një lufte të hapur ndaj korrupsionit të trashëguar si dhe një pastrim strukturor përmes rindërtimit të strukturës së qeverisjes. Na duhet shërbim dhe nuk duhet të neglizhojmë asnjë marrëdhënie të askujt me shtetin si qytetar apo sipërmarrje. Na duhet ndëshkim në të gjitha nivelet lidhur me çdo shfaqje të korrupsionit, të abuzimit me qytetarët.
Vettingu në polici dhe goditja e bandave
Rama: Duhet të përcaktojmë kornizën e vettingut në Policinë e Shtetit për të hyrë deri në qelizë me një terapi intensive ndaj kancerit të policisë së shtetit me vite e vite të tëra, si dhe të fillojmë operacionin kombëtar në luftën ndaj krimit dhe për çrrënjosjen e kanabisit dhe heqjen e Shqipërisë për kultivimin e saj në vend. Lufta ndaj kanabisit nuk mbaron me çrrënjosjen e tij por me ndjekjen e rrjeteve kriminale, por edhe të gjithë të fortëve që janë mësuar të bëjnë ligjin nëpër feude të ndryshme nëpër periferitë e qendrave urbane. Në këto 100 ditë do të kemi rezultate konkrete.
https://www.facebook.com/edirama.al/videos/10155204932871523/
