Mbledhja e opozitës në Durrës, paralel me seancën në Kuvend, ka nisur nga ana e kreut të PD, Lulzim Basha, me një ultimatum ndaj Ramës e Ruçit. Kryetari i opozitës paralajmëroi se nuk do të ketë asnjë negociatë me Ramën, deri në dekriminalizimin e plotë të institucioneve të shtetit.
“Nuk ka dhe nuk do të ketë asnjë negociatë, asnjë diskutim, asnjë ulje në tavolinë bisedash me Ramën dhe bandën e tij, sa kohë që institucionet e vendit janë pushtuar nga krimi dhe politikanë të lidhur me krimin.
Ne do të luftojmë deri në fund, për të arritur dekriminalizimin e plotë, për të larguar politikanët e lidhur me krimin nga institucionet e vendit, me çdo mjet dhe çdo formë”, tha Basha nga Durrësi, ku u mblodhën këtë të enjte grupet parlamentare të opozitës, të cilat kanë bojkotuar Kuvendin për të dytën javë.
Në fjalën e tij, Basha po ashtu akuzoi kreun e qeverisë se po grabit pronën e konsullatës shqiptare në Nju Jork, për të ndërtuar një grataçelë në SHBA, si dhe u bëri thirrje të gjithë qytetarëve shqiptarë që të refuzojnë me çdo mjet pagesat për “Rrugën e Kombit”.
Sipas kreut të PD, Edi Rama prej pesë ditësh ndodhet në Nju Jork, ku ka shkuar “të vjedhë territorin e konsullatës shqiptare atje, për të ngritur një grataçelë me miqtë e tij, me një akt grabitje të pronës së shtetit shqiptar”.
“Kapet një hajdut duke vjedhur dhe shkon në burg, kapet Edi Rama duke vjedhur dhe shkon 5 ditë në Nju Jork, për të përgatitur një tjetër vjedhje”, tha Basha.
