Kryeministri Edi Rama ka folur nga Sofja lidhur me operacionin e zhvilluar në Durrës, ku u kapën 613 kg kokainë.
Lidhur me takimin e kryeministrave të rajonit me Presidentin e KE-së, Mogherinin, Hahn dhe Borisov, Rama u shfaq tepër pozitiv teksa tha se presim një rekomandim pozitiv nga KE për celjen e negociatave.
Megjithatë, Rama u fokusua më shumë te operacioni i djeshëm, teksa ritheksoi, ndryshe nga ministri Xhafaj, se operacioni është kryer vetëm nga agjensitë tona ligjzbatuese, ndërsa nuk harroi të mburrej teksa tha se nga ana tjetër, kokainë u ka shpëtuar kontrolleve në portet e BE-së.
Ndryshe nga kryeministri, ministri i Punëve të Brendshme, Fatmir Xhafaj në reagimin e tij të parë pas kapjes së sasisë prej 613 kg kokainë në Durrës, deklaroi se ishte “Një superaksion i Policisë së Shtetit në bashkëpunim me agjencitë e tjera ligjzbatuese vendase dhe të huaja”.
FJALA E PLOTË:
Ky ishte një takim përmbyllës i vizitës së presidentit të Komisionit për Zgjerim dhe të shefes së diplomacisë evropianë këtu në Sofje. Ishte një bilanc që e konsideroj shumë pozitiv, po ashtu një diskutim mbi ecurinë e procesit të Berlinit në aspektin e financimeve të pritshme, ku korridori blu është një prioritet parësor. Ajo çka vlen të theksohet është këndvështrimi shumë pozitiv i kësaj tresheje që është treshja e referencës për vendet anëtare lidhur me ecurinë e Shqipërisë në këtë moment kyc, ku presim një rekomandim pozitiv nga KE dhe sigurisht një përgjigje pozitive nga vendet anëtare.
Është e qartë që duhet të punojmë intensivisht në këtë periudhë për sa i përket vendeve anëtare, por po ashtu e qartë se ka një mirëkuptim të gjerë për hapat që ka bërë përpara Shqipëria. Mbase vlen të nënvizohet se dhe operacioni më i fundit i agjencive ligjzbatuese, hetimi doganor, Policia e Shtetit me mbështetjen e Prokurorisë pati një jehonë shumë pozitive dhe u vlerësua më pozitivitet maksimal duke pasur parasysh që ngarkesa e kapur është më e madhja e kapur ndonjëherë prej nesh, por edhe që para se të vijë në vendet tonë ka kaluar në portet e BE-së, dhe faktikisht i ka shpëtuar kontrolleve. Ashtu si kundër ishte po kaq e rëndësishme edhe vetëdija dhe nënvijëzimi i kësaj vetëdije që ky ishte një operacion mirëfilli mirëfilli i agjensive tona ligjzbatuese, pa një sinjalizim nga partnerët. Është krejt e natyrshme që të punojmë me partnerët, por në këtë rast është treguar gatishmëri e lartë e forcave tonë në luftën kundër trafiqeve, në këtë përballje të fortë kundër krimit të organizuar dhe trafikantët të çdo lloji. Faza e parë për çrrënjosjen e kanabisit, ia ka lënë vendin fazës së dytë. TIRANA TODAY
