Kryeministri Edi Rama po zhvillon një takim të paparalajmëruar në Ministrinë e Arsimit me rektorët e dekanët për 8 pikat që kërkojnë studentët t’u plotësohen. Ai ka kritikuar drejtpërdrejt dekanët e rektorët për tarifën e provimeve të mbartura, ndërsa theksoi se një nga çështjet me rëndësi është korrupsioni që ndodh në universiteti, pikë kjo që duhet të jetë në listën e kërkesave, sipas Ramës.
Fjala e Ramës:
Ju nuk jeni asgjëkundi. Asnjë nga ju nuk është dukur asgjëkundi. Nuk e them për të kërkuar që pse ka ndodhur një gjë e tillë, sepse ju jeni të zgjedhur nga radhët e universitetit dhe patjetër që nuk merrni urdhra nga qeveria. Por, kjo është një çudi për mua që dua ta shpreh publikisht, ndërkohë që nëse nisemi nga 8 pikat që studentët kanë kërkuar, një pjesë e atyre pikave i takojnë universitetit, ju takojnë juve si përfaqësues të universitetit.
Më vjen mirë që në 2 ditët e fundit disa senate janë vënë ën lëvizje. Më vjen keq që kanë publikuar deklarata hipokrizie që nuk adresojnë themelin e çështjes. Nuk po hyj në aspektin tjetër të protestës që përbën shqetësimin më të madh që lidhet me frustrimin e tmerrshëm që kanë studentët për korrupsionin në universitet.
Para se të hynim në këtë fazë, protesta nisi me një shkak konkret lidhur me një tarifë. Tani tarifa e provimeve të mbartura është një tarifë e kërkuar nga ju dhe këtë as s’mund ta mohoni, as të bëni sikur e keni harruar. Është propozuar nga ju, për të cilën ministrja e Arsimit qysh në krye të herës ka kërkuar konsensusin mes jush. Nuk hyj në meritën e atij vendimi, por ama ai vendim që është marrë në maj nuk ka qenë i ditur për studentët dhe është njësoj si parlamenti të kalojë një buxhet, dhe të mos bëhen të ditura detyrimet.
Në vetvete kjo edhe mund të ndodhë, por që të çohen në protestë e të kërkojnë publikimin e buxheteve dhe shpenzimeve online është fundi.
Protesta e studentëve është shuplakë për qeverinë, grusht për opozitën, shpresë për opinionin publik. Ça është për ju, ju do ta gjeni vetë./ TIRANA TODAY
