Dhjetëra punonjës për ndërtimin e ByPass-it në zonën e Vlorës dhe Fierit janë mbledhur para Kuvendit, ku protestojnë për pagat e tyre të prapambetura. Punonjësit deklarojnë se janë mbi 1000 familje që kanë 16 muaj pa marrë pagat e tyre, ndërsa paralajmëruan se do të ketë protesta të tjera nëse shteti nuk gjen zgjidhje për ta.
Protestuesve u është bashkuar edhe kryetari i Partisë Demokratike, Lulzim Basha, i cili u takua me ta dhe premtoi se do i mbështeste deri në fund. Një nga protestuesit i kërkoi Bashës që ta ngrejë zërin për ta dhe të fitojnë të drejtat e tyre.
“Dua të ngresh zërin për ne, që ne të fitojmë të drejtat tona si qytetarë të këtij vendi. Nuk e di se kush e ka bërë fajin, këta prindër nuk mund të shkatërrojnë familjet. Duhet ta ngresh zërin shumë fort, lekët duhet të vijnë në dorën tonë. Këta po luftojnë që ta largojnë këtë popull”.
Ndërkohë, kryedemokrati Basha gjatë fjalës së tij akuzoi Ramën dhe Gjiknurin se nuk u japin paratë që u takojnë punonjësve, pasi duan t’i mbajnë për vete ato:
Së pari dua t’i përshëndes të gjithë punonjësit e bypass-it të Fierit që janë mbledhur në këtë protestë. Dua t;ju them që PD, opozita dhe unë e kemi dëgjuar problemin tuaj. Mosmarrja e pagesave është pasojë e drejtpërdrejt e korrupsionit. Firma nënkontraktore ka lënë një garanci dhe ajo mjafton për të paguar detyrimet që shteti u ka nënkontraktorëve. Sipas informacionit tonë kjo pagesë nuk kryhet sepse ka korrupsion qeveritar dhe kryeministror. Janë me dhjetëra telefonata, Rama dhe Gjiknuri janë të përfshirë në një aferë për t’i marrë këto lekë për vete. Kjo përben një krim të rëndë që duhet hetuar. E the shumë mirë, nuk mund të jetë shtet i drejtë ai që kur vjen puna te detyrimet të gjobit e të arreston, por kur vjen puna te të drejtat, nuk ju respekton. Garancia prandaj është dhënë, në rast se kontraktori dështon, shteti t’ua japë ju këto të dhëna. Shteti i ka pranuar paratë, janë të faturuara. Do bëjmë gjithçka që ju t’i merrni paratë që ju detyrohet shteti shqiptar. Jemi në krahun tuaj dhe do jemi deri në fund të kësaj proteste. TIRANA TODAY
