I lajthitur, papërgjegjshëm, gënjeshtar dhe ordiner. Kështu iu drejtua nënkryetari i LSI-së Luan Rama, kryeministri Edi Rama, pas akuzave se “LSI ka inskenuar rastin e blerjes së votave në Ksamil”, që u denoncua sot.
Gjatë një konference për shtyp, Luan Rama hodhi poshtë me anë të provave të paraqitura akuzat e Kryeministrit, duke thënë se kemi thjeshtë të bëjmë me përkim emrash e mbiemrash të cituar si pronarë të automjetit me të cilin ndaheshin para në këmbim të votave në Ksamil.
Emri Ilir Hysi ishte nyja në akuzat e ndërsjellta LSI-PS-LSI, por Luan Rama shpjegoi se njeriu i LSI-së quhet Ilir Vilson Hysi dhe ka vetëm një automjet tip benz AA474 NG, ndërsa tjetri është Ilir Fatmir Hysi, sipërmarrës në Sarandë që ka një aktivitet të dhënies së makinave me qira.
Sakaq ai sqaron se, personi i denoncuar nga LSI, është Jani Bregasi, sipërmarrës dhe simpatizant i rilindjes, që ka marrë automjetin e denoncuar me qira.
“Ti zëdhënës i gënjeshtrave, të paktën shfrytëzo atributet e kryeministrit për të marrë informacionet e nevojshme në mënyrë që të mos inkriminosh e përgojosh njerëz të pafajshëm” iu drejtua Luan Rama, Edi Ramës.
LSI i bëri thirrje Kryeministrit: “Ndalo bandat me polic me uniformë e pa uniformë dhe njerëzit e inkriminuar që po përpiqen të falsifikojnë e trafikojnë me paratë e kanabizimit zgjedhjet e 25 qershorit, dhe dëshpërimin e panikun për humbjen mos e shfaq me akuza të pabaza”.
