“Shqipëria nuk do të pranojë kurrë kampe refugjatësh, në këmbim të pranimit në BE”. Ky është qëndrimi i radhës bërë publik në një intervistë për gjermanen “Bild”. Deklaratat e tij nuk kanë një linjë të rregullt, ku pas një qasje ndryshe dhënë pas takimit me kancelarin austriak, Sebastian Kurz, më pas ai ndryshoi strategjinë e lojës, duke e cilësuar si një fantazi.
Çfarë nuk shkon me qëndrimin e Ramës?
Kurz, pas takimit me kryeministrin e Shqipërisë, Edi Rama, në kryeqytetin e Austrisë, Vjenë, tha se në Ballkan është formuar një rrugë e re e refugjatëve dhe sipas tij, siguria e Evropës varet nga stabiliteti i Ballkanit. Duke nënvizuar se çështja më e rëndësishme e diskutuar në bisedime është lufta kundër emigracionit të paligjshëm, Kurz tha:
“Një rrugë e re për refugjatët po formohet në Ballkan. Trafikantët e qenieve njerëzore po përpiqen të kalojnë njerëz nga Greqia përmes Shqipërisë në Evropën Qendrore. Përballë këtij zhvillimi të ri, nuk do të jemi spektatorë, por do të luftojmë”.
https://tiranatoday.com/kancelari-austriak-i-hapi-goxha-pune-rames-per-refugjatet-cfare-po-bluan-ne-mendje-kryeministri/
Po kështu Kurz theksoi se Shqipëria duhet të mbështetet nga BE si financiarisht ashtu edhe teknikisht, me qëllim që të shmang krizën e refugjatëve të vitit 2015 dhe 2016. Nga ana tjetër, Rama theksoi se po bëhen përpjekje për të formuar një rrugë të re, për refugjatët nëpërmjet Shqipërisë.
“Refugjatët ilegalë nga Greqia, po përpiqen të kalojnë në Evropën Qendrore nëpërmjet Shqipërisë. Ka një rritje serioze të lëvizjes së refugjatëve. Për momentin ne mund ta mbajmë nën kontroll këtë situatë, po është e nevojshme të veprohet sa më parë brenda bashkëpunimit, para se të përjetohen skenat që shokuan dhe dëmtuan Evropën në vitin 2015”, tha Rama.
Me shtimin e presionit nga ana e opozitës, Rama ndryshoi kartat nën mëngë. Ai u vu në krah të qytetarëve, duke shfajësuar veten, se tentativat e dështuara të demokratëve janë veçse një zhgënjim.
https://tiranatoday.com/refugjatet-ne-shqiperi-kush-po-genjen-xhafaj-apo-rama/
Rama për Anadolu Agency: Kjo është fantazi
Rama, në një intervistë të dhënë më herët për agjencinë turke të lajmeve Anadolu Agency (AA), u prononcua lidhur me raportimet e fundit mediatike për mundësinë e ngritjes së një kampi refugjatësh, apo qendre për trajtimin e luftëtarëve të huaj në Shqipëri.
https://tiranatoday.com/kampe-per-refugjatet-dhe-ushtaret-e-isis-reagon-rama-kjo-eshte-marrezi/
“Kjo është një fantazi”, tha Rama, duke hedhur poshtë të gjitha raportimet mbi këto tema. Kryeministri tha se këto pretendime nuk reflektojnë të vërtetën dhe tha se Shqipëria ka ngritur një qendër, e cila është një qendër studimore, programesh, analizash, ndërveprimesh kundër ekstremizmit të dhunshëm, dhe që është propozuar që të zgjerohet në një qendër rajonale, qendër ekselence që ka të bëjë me fenomenin e ekstremizmit të dhunshëm dhe që trajton në rrugë të ndryshme këtë fenomen.
Revista gjermane: Shqipëria, vendi ideal për refugjatët
Ndonëse qeveria shqiptare e kundërshton me forcë, mediat gjermane vijojnë të shkruajnë se Shqipëria është vendi më i mundshëm për ngritjen e këtyre kampeve. Revista “Focus” ka shkruar jo më larg se dje se kjo ide është diskutuar edhe gjatë samitit të fundjavës për çështjen e emigrantëve. Duke qëndruar në të njëjtën linjë, revista shkruan se kundër marrjes së refugjatëve flet skepticizmi i popullsisë.
“Në popullatën shqiptare është e qartë se nuk pranohet ideja e mbërritjes së refugjatëve, qoftë edhe për kontrollin e kërkesave për azil dhe rishpërndarjen në BE. Në këtë kontekst, opozita shqiptare po e përdor këtë temë për të ushtruar presion mbi qeverinë e Edi Ramës, me pohime pjesërisht groteske”.
Një ditë pas vendimit të BE për hapjen e negociatave në vitin 2019, kryeministri Rama ka deklaruar se refugjatët s’mund të trajtohen si mbetje toksike.
“Ne nuk do të pranojmë kurrë të tilla kampe refugjatësh, sepse kjo do të thotë që t’i trajtosh njerëzit e dëshpëruar si mbetje toksike që askush nuk i do”, është shprehur kryeministri Rama, në një prononcim për Bild.
Deklaratat e tij janë hera-herës kontradiktore, pasi Rama shprehet i gatshëm që të japë kontributin e duhur për barrën europiane, por kjo nuk do të thotë se Shqipëria mund të bëhet mbështetje për problemet e çdokujt.
“Edhe në këmbim të anëtarësimit në Bashkimin Europian, Shqipëria nuk do të ndërtonte kampe refugjatësh. Kriza e refugjatëve duhet të trajtohet pavarësisht nga gjendja aktuale e përpjekjeve tona të pranimit në BE”, u shpreh kreu i qeverisë.
TIRANA TODAY
