Kryeministri Rama i ka deleguar detyrën e ministrit për Punët e Jashtme e Integrimit, zëvëndësministrit Gent Cakaj. Në ceremoninë e dorëzimit të detyrës nga ministri i mëparshëm Ditmir Bushati, kryeministri Edi Rama mbajti atë që e cilësoi si “fjalimin më të shkurtër të jetës”, kur tha vetëm se i delegon detyrën Gent Cakajt.
‘Cakaj do të jetë kryediplomati i Shqipërisë brenda dhe jashtë vendit’, tha Rama.
Në fjalën e tij, Cakaj u shpreh se ky është një start goxha i garantuar në dritën e zjarrit të akuzave që janë hedhur ndaj tij.
‘Të qenit drejtues i këtj institucioni me kompetenca të deleguara nga Rama, është një start goxha i garantuar në dritën e zjarrit të akuzave pa baza.
Delegimi i kompetencave te një ministër 28 vjeçar, nuk vë në diskutim masën e qendrueshme të rezultateve dhe gamën e gjerë të suksesve që kjo ministri ka pasur. Mosha ime u konsiderua si faj. Do të shtyjmë përpara Shqipërinë drejt rrugës së Bashkimit Europian’, tha Cakaj.
