Kryeministri Rama nga qyeti i Delvinës ku zhvilloi një takim me votuesit socialistë, ka ironizuar vendimet e Partisë Demokratike gjatë viteve në opozitë, si dhe ka sulmuar sërish Unionin e gjykatësve lidhur me padinë kundër Vettingut.
Kreu i qeverisë, tha se gjykatësit kanë bërë një veprim të gabuar pasi për të ecur drejt BE-së duhet të zbatohet Vettingu.
Po ashtu, Rama sërish u bëri thirrje qytetarëve që ti japin mundësinë Partisë Socialiste të drejtojë e vetme vendin duke premtuar se në këtë mënyrë do të bëjnë 4-fishin e asaj që u bë 4 vjetët e shkuar.
“Ne nuk kërkojmë të marrim më shumë pushtet për vete. Kërkesa për të marrë më shumë përgjegjësi në qeverisje është sepse nëse nuk jemi të vetëm, e kemi të pamundur ta shpëtojmë administratën nga kanceri i copëzimit prej partive prej shumë vjetësh. Çfarë na pengon ne që të ndërtojmë një administratë të denjë, që të moshuarit të mos tallen nga zyra në zyrë nëpër sportele që janë atje se janë vënë atje nga një parti e caktuar. Ne do ta çojmë ekonominë mbi 5 për qind deri në vitin 2018.
Këto do e bëjmë pasi Vettingu të jep mundësi, garanci që investitori i huaj të mos të këtë frikë për investime ,”-tha Rama.
Gjithashtu, Rama ka “goditur” kryetarin e Partisë Demokratike, duke iu referuar shprehjes së tij, se ai do të jetë kryeministër i ekonomisë.
“Po çfarë kryeministër ekonomie thotë ai. Me atë plan taksash ku do t’i gjejë paratë për të investuar te Sudja? Sudja të paktën e kishte fytyrën më të sinqertë”, tha Rama.
Në vijim të fjalës së tij, kryeministri i vendit, ka ironizuar edhe vizionin e PD-së lidhur me pretendimin për qeverisjen e tyre për 4-vjeçarin e ardhshëm dhe bashkëqeverisjen me partitë e vogla.
“Partia Demokratike po bën çudira, fut në lista Dashin e Havasë dhe Dulen. Dulja u fut në listat e PD-së për të ngrënë sardelen e vetë. Ne e nderuam Dulen dhe e bëmë nënkryatrin e Kuvendit ndërsa ai iku. Tani kërkon votë për PD-në të futet në Parlament. Po ashtu, edhe ai patrioti ka filluar e kërkon vota për Dulen të futet në parlament vet”,-tha Rama.
