Kryeministri Edi Rama ka zhvilluar një takim me banorë të Librazhdit, të cilëve u ka kërkuar ndihmën për të qeverisur vetëm.
“Nuk kemi bërë sa duhet, kemi bërë sa kemi mundur, nëse do na jepni fuqinë e plotë, në 4 vitet e ardhshme do bëjmë 4-fishin e atyre që kemi bërë në këto 44 muaj”, tha Rama.
Gjithashtu, kreu i PS-së tha se do rrisë ekonominë me 5%, ndërsa premtoi se rroga minimale në 4 vitet e ardhshme do të shkojë në 300 mijë lekë të vjetra.
Rama u kërkoi votën e qytetarëve pavarësisht bindjeve të tyre politike.
FJALA E RAMËS NË LIBRAZHD:
Është koha për të marrë një vendim historik, që pushteti i dalë nga zgjedhjet i takon popullit dhe jo partive. Është koha për t’i dhënë autonominë PS-së, jo për më shumë pushtet, por për më shumë fuqi për të bërë shtetin e të gjithë shqiptarëve. Të ndërtojmë një administratë që të jetë krenaria jonë, jo turpi ynë.
Është koha për t’i dhënë PS-së një mandat të plotë, për ta rritur ekonominë si asnjëherë më parë, për ta cuar mbi 5% rritje. Është koha për t’u bashkuar, për të qenë të gjithë së bashku. Rroga minimale në 4 vitet e ardhme të shkojë 300 mijë lekë, të rriten deri në 40%, pensionet të rriten cdo vit.
Këto janë shumë të thjeshta nëse na jepni timonin e qeverisjes pa na ulur të tjerë në prehër.
Ne zotohemi që ta rrisim ekonominë. Jam i bindur se nuk do votoni për t’i gjetur punë Lulit, një punë që nuk e bën dot. Do mendoni për Shqipërinë, më pas për partinë. Populli do bëjë një kryengritje me votë për ta shembur sistemin e kalbur që ka kapur peng administratën.
Kemi bërë sa kemi mundur, nëse do na jepni fuqinë e plotë, në 4 vitet e ardhshme do bëjmë 4-fishin e atyre që kemi bërë në këto 44 muaj.
Na duhet vendosmëri e kokëfortësi për t’i zbrapsur hordhitë e partive që sulmojnë administratën e ua nxijnë jetën njerëzve. Vota e 25 qershorit duhet të mbështesë punën, jo llafet. Më ndihmoni që të kemi fuqinë që na duhet për t’ju zgjidhur 1001 halle që mbeten pa u zgjidhur për shkak të sistemit. Ngrijeni lart flamurin e Skënderbeut, vota e secilit është një fuqi më shumë për ta cuar flamurin në qiellin e Evropës./ Tirana Today
