Deputeti Fatmir Toçi ka reaguar për herë të parë pas lënies jashtë listës së kandidatëve për deputetë të Partisë Socialiste.
Deputeti i qarkut të Vlorës u tregua realist teksa pohoi se në fakt do të kishte dashur të ishte sërish deputet në 4-vjeçarin e ardhshëm, ndërsa shtoi se kjo nuk e pengon që të marrë pjesë në fushatën e PS-së.
“Shumë e kanë menduar të jenë në lista, edhe unë e kam menduar, është shumë e natyrshme, pse të bëj hipokritin, do doja të isha edhe këtë katërvjeçar, se kjo është periudha e projekteve. Kjo nuk ndryshon asgjë në qëndrimin tim, as me Partinë Socialiste, as me fushatën, ne jemi anëtarë të PS dhe besojmë në këtë forcë politike, te programi i ndryshimeve të mëdha që kanë filluar në të gjithë vendin. Listat janë ato që keni parë, unë nuk flas dot për listat e qarqeve të tjera se jo të gjithë i njoh, unë flas për qarkun e Vlorës, lista relativisht e mirë, e pranueshme, sapo jam njohur me listën i kam telefonuar edhe gjithë kandidatëve për zgjedhjet e ardhshme, i kam uruar suksese. Nuk mund të them që me vjen keq, apo nuk më vjen keq, por të gjithë e kanë dëshirën dhe të drejtën për të përfaqësuar zgjedhësit në parlament, them se përtëritja i bën mirë çdo institucioni. Do të marr pjesë në fushatë, padyshim, jam pjesë e PS dhe do të jem gjithmonë aty ku ka nevojë”, është shprehur Toçi.
