Një ndër figurat më të rëndësishme të politikës shqiptare, Jozefina Topalli, është përballur së fundmi me “shuplakën” nga ana e kreut demokrat Basha, por edhe pakënaqësitë nga ana e qytetarëve. Një status që postoi dy ditë më parë në Facebook, ka shtuar edhe më shumë dozën e rebelimit nga ana e qytetarëve, të cilët i kërkojnë që të mos përbaltë PD-në.
Ajo i sillte në kujtesë kryedemokratit Basha se gruaja, kunati, vjehrri dhe disa oligarkë vendosin se kush dhe ku do kandidojnë në emër të PD. Por të gjithë mllefin nuk e ka lënë me kaq, pasi i kujton se familja e tij nga gruaja, nuk ka votuar asnjëherë PD deri në 2005, ndërsa vetë gruaja nuk ka votuar kurrë.
Pasi u hakmor në këtë formë, duke i nxjerrë të gjithë të “palarat” Bashës, qytetarët e kanë vënë me “shpatulla pas murit” Topallin. Qytetarët shprehen të zhgënjyer, duke i vënë në dukje se ajo nuk duhet të jetë kurrsesi pro përçarjes së grupit të PD-së. Komentet e tyre shkojnë deri në atë pikë, sa e akuzojnë Topallin si përgjegjëse të përçarjes së PD-së dhe se po mbron me çdo kusht Ramën.
