Vijon të mbetet e tensionuar situata edhe gjatë ditës së sotme në Kukës, pas protestës së dhunshme në pikën kufitare të Kalimashit. Disa qytetarë të Kukësit, shoqëruar dhe nga deputetët e PD-së dhe LSI-së, kanë mbërritur këtë mesditë para komisariatit të Kukësit, duke vijuar protestën pas ndalimit të 24 personave nga policia, të cilët akuzohen për dhunën e ushtruar ndaj uniformave blu gjatë protestës së djeshme.
Familjarët e protestuesve të arrestuar gjatë natës në Kukës kanë “rrethuar” paraditen e së dielës Komisariatin e Kukësit.
Sipas tyre, policia ka ardhur në shtëpitë e tyre natën për të arrestuar pjesëmarrësit në këtë protestë dhe thonë se efektivët e policisë kanë ushtruar dhunë nëpër banesa.
“Kanë ardhur me maska e na kanë trajtuar si kriminelë”, shprehen ata, duke kërkuar lirimin e të arrestuarve.
Deputetët e PD dhe LSI zhvilluan një takim me drejtorin e Policisë së Kukësit, të cilit i kanë kërkuar lirimin e 24 protestuesve të arrestuar. Nga ana e tij, kryepolici i qarkut verilindor ka refuzuar kërkesën e ligjvënësve, duke sqaruar se protestuesit kanë shkelur ligjin dhe nuk mund të lirohen. Pas daljes nga takimi me kryepolicin, deputetët deklaruan se situata do të përshkallëzohet edhe më tej, nëse nuk lirohen personat e arrestuar, ndërsa janë larguar nga komisariati së bashku me protestuesit.
“Urdhër-arreste janë lëshuar për 24 të arrestuarit. Po kaq janë edhe në kërkim. Të arrestuarit i kanë dërguar në Tiranë dhe nuk janë këtu në Kukës. Nëse do vazhdojnë me formë të tilla represive, situate mund të eskalojë. Shpresoj që ky zë të jetë dëgjuar. Në varësi të situatës do mbajmë qëndrimet tona”,-tha Edmond Spaho, kryetar i grupit parlamentar të PD-së.
Të shtunën, protestuesit dogjën dhe shkatërruan sportelet e vjeljes së tarifës së rrugës, të vendosura nga koncesionari, ndërsa paralajmëruan se do të rikthehen të bëjnë të njëjtën gjë nëse ato do të rivendosen sërish në funksion.
