Çmimi i Madh i Silverstone në Britaninë e Madhe dhuroi spektakël që me nisjen e xhiros së parë, por për fat të keq, kryesuesi i kampionatit në Formula 1 Max Verstappen u detyrua të dilte nga gara vetëm pas disa kthesave.
I nisur nga vendi i parë, Verstappen kishte mbrapa tij 7 herë kampionin e botës Lewis Hamilton, i cili ishte tepër agresiv dhe luftoi ”rrotë më rrotë” me holandezin. Të dy pilotët nuk lëshuan ndaj njëri-tjerit, dhe patën një kontakt në kthesën e shtatë, e cila rezultoi fatale për Verstappen.
Piloti i Red Bull u përplas me muret rrethuese teksa shpejtësia ishte tepër e madhe, dhe u dërgua menjëherë në spital për një kontroll të imtësishëm, por fatmirësisht gjendja e tij shëndetësore paraqitet e mirë.
Përtej kësaj, shkatërrimi i plotë i njëvëndëshes nga përplasja me barrierat ka edhe një kosto të lartë financiare dhe Helmut Marko, shefi sportiv i Red Bull, ka treguar pasojat ekonomike që kishte kjo përplasje, shkruan Racing News.
“Për fat të keq, Verstapen nuk do të ulet më në këtë makinë, pasi është shkatërruar totalisht. Sa do të na kushtojë ky telash? Rreth 750 mijë euro”, tha ai, duke shpjeguar se më përpara duhej bërë një bilanc i gjendjes së motorit të njëvendëshes kur të çohej në fabrikë, pasi vlera mund të rritej edhe më shumë. Në një kohë vështirësish ekonomike si kjo aktuale, një shifër e tillë është domethënëse dhe na dëmton”, ishin fjalët e drejtuesit të Red Bull rreth aksidentit të fundjavës.
