Bukuritë natyrore të Veriut të Shqipërisë do të ndëshkohen përsëri. Pas lumit Valbona, i vjen radha lumit të Shalës, një tjetër bukuri e pashoqe e alpeve shqiptare, dhe një prej destinacioneve më të preferuara të turistëve, sidomos atyre të huaj. Aty do të ndërtohet hidrocentrali i Shalës.
Ministria e Energjisë dhe Industrisë, në fund të mandatit qeverisës ka shpallur një tjetër koncesion.
Në njoftimin zyrtar të Agjencisë së Prokurimit Publik, të raportuar nga scantv, ftohen operatorët e interesuar të paraqesin ofertat e tyre për atë që do të quhet, hidrocentrali i Shalës.
“Interesi për shfrytëzimin hidroenergjetik është për ujërat e lumit te Shalës, midis kuotave 486 metra mbi nivelin e detit deri në 176.00 metra mbi nivelin e detit, i cili është edhe kuota maksimale e rezervuarit të Komanit, duke respektuar kushtet teknike të projektimit dhe mos cenimit të objekteve që parashikohen të ndërtohen në këtë pellg ujëmbledhës” thuhet në njoftim.
Lumi i Shalës është lumi i cili buron rrëzë Alpeve Shqiptare. Ka një gjatësi prej 37 km prej burimit në majën e Radohinës e deri në Drin. Është lumë malor me rënie mesatare 22 metra në një kilometër. Lumi Shala dallohet me ujin e tij të kristaltë, me prurje mesatare vjetore, afro 34 m³/sek. Prurjet maksimale arrijnë në nëntor me 52m3/sek, ndërsa prurje minimale në gusht në të cilin arrin 9m³/sek. Lumi i Shalës është i pasur me një shumëllojshmëri peshqish, por më i përhapuri është trofta, që rritet vetëm në ujërat e ëmbla.
