Pas shpalljes së Pavarësisë nga Parlamenti i Katalonjës, vepron qeveria e Spanjës.
Kryeministri i Spanjës, Rajoy ka mbledhur Këshillin e Ministrave, ku u mor vendimi për shkarkimin e presidentit katalanas, Carles Puigdemont dhe të ministrave të tij, si dhe rikthimin e rendit kushtetues në rajon.
Kështu, qeveria spanjolle ka shpërbërë parlamentin katalanas, ndërsa kryeministri Rajoy ka njoftuar vendimin për zhvillimin e zgjedhjeve të parakohshme, të cilat do të mbahen më 21 dhjetor.
Paraditen e sotme, kryeministri Rajoy u kërkoi senatorëve të aprovonin aktivizimin e nenit 155, që parashikon vendosjen e sundimit direkt në Katalonjë e marrjen e kontrollit të policisë, financave e televizionit publik.
70 deputetë katalanas votuan pro shpalljes së pavarësisë dhe vetëm 10 prej tyre i thanë jo shkëputjes nga Madridi, ndërkohë që opozita e kishte bojkotuar seancën. Në parlament është kënduar himni katalanas Els Segadors, ndërsa në shesh kanë nisur festimet. Rajoni shpalli pavarësinë pas dështimit të dialogut me Madridin zyrtar.
Kriza filloi kur Katalonja kërkoi pavarësinë me anë të një referendumi që u mbajt më 3 tetor, ku qytetarët votuan në favor të pavarësisë dhe shkëputjes nga Spanja.
