Një i ri i cili qarkullonte me një armë zjarri pa leje në Tiranë, tashmë është vënë në pranga. Gjatë kontrollit të ushtruar nga shërbimet e policisë, shtetasit Antonio Gjoshi, 25 vjeç, i është gjetur një çantë, ku brenda saj kishte një armë zjarri tip “Bereta” me një krehër me 8 fishekë, të cilat u sekuestruan në cilësinë e provës materiale.
“Shërbimet e Komisariatit të Policisë Nr.6, në bashkëpunim me Seksionin e Forcës së Posaçme të Kërkimit dhe Operacioneve Speciale, në vijim të planit të masave për kapjen e personave në kërkim, të atyre që qarkullojnë me armë zjarri apo që tentojnë të shpërndajnë lëndë narkotike, kanë ushtruar kontrolle në akset rrugore të kryeqytetit gjatë të cilave u arrestua në flagrancë shtetasi Antonio Gjoshi, 25 vjeç, banues në Vaqarr, Tiranë.
Gjatë kontrollit të ushtruar nga shërbimet e policisë, këtij shtetasi iu gjet në çantë një armë zjarri tip “Bereta” me një krehër me 8 fishekë, të cilat u sekuestruan në cilësinë e provës materiale”, raporton policia.
Materialet iu referuan Prokurorisë së Rrethit Gjyqësor Tiranë, në ngarkim të shtetasit të lartpërmendur, për veprën penale “Prodhim dhe mbajtja pa leje e armëve dhe municionit luftarak”.
