Ish-drejtori i Policisë së Kosovës, Rashit Qalaj, e ka konsideruar të tensionuar situatën në veri të vendit. Reagimi i tij ka ardhur pas vendimit të masës së reciprocitetit për targat me Serbinë. Sipas tij, deputetët e Listës Serbe dhe strukturat komunale, po e udhëheqin këtë protestë, në koordinim me Beogradin.
“Janë bërë disa ditë që forcat Speciale gjenden në pjesën veriore të Kosovës, ku për momentin raportohet që situata është e qetë. Edhe pse unë e shoh mjaft të tensionuar me vet faktin që kemi njerëz në rrugë, kemi protestues e bllokadë të rrugëve.
E asesi nuk mund të themi që situata është e qetë, pasi që kemi bllokim të lirisë së lëvizjes. Ju i keni parë se atje janë strukturat komunale, pjesëtarë të Listës Serbe, të cilët në një farë mënyrë po e mbajnë një komunikim me policët dhe me institucionet e Kosovës. Ndërsa në anën tjetër po i udhëheqin protestuesit duke i udhëzuar sesi të veprojnë, gjithmonë në koordinim që e kanë me Beogradin”, tha Qalaj.
Dy ditë më parë, pas mbledhjes së qeverisë, kryeministri Kurti tha se është i gatshëm që të heqë masën e reciprocitetit për targat në rast se edhe Serbia zotohet se do ta bëjë një gjë të tillë kundrejt Kosovës. Kryeministri Albin Kurti u ka bërë thirrje serbëve të largojnë barrikadat në Jarinje dhe në Bërnjak pas reciprocitetit për targat e automjeteve të Serbisë, duke thënë se personi i vetëm që dëshiron incidente është presidenti Aleksandër Vuçiç.
