Kamer Qaka: një emër i panjohur për shumë shqiptarë, tashmë është pjesë e Shqipërisë dhe do të vihet menjëherë nën urdhrat e Kristian Panuçit.
Por kush është Qaka? Me origjinë nga Kosova, 22-vjeçari ka shkuar në Norvegji që në moshën 2.5 vjeç dhe është rritur aty. Për shumë vite te Valerenga në Oslo, deri në verë luante te Kristiansundi, ku vjet u shpall Futbollisti i Vitit në divizionin e dytë dhe sivjet shkëlqeu edhe në Eliteserien, para se në verë të shkonte në Rumani, te Poli Iashi. Mesfushor qendror, me tipare mbrojtëse, Qaka është një luftëtar, një ushtar i vërtetë, i cili në krah ka tatuazh shqipen e flamurit tonë.
“Ishte çmenduri, kam qarë për 20 minuta. Idhujt e mi që fëmijë, luajnë për Shqipërinë, ndaj nuk di se çfarë të them. Jam ende i shokuar. Kam qenë shumë mirë gjatë këtij viti, dhe tashmë gjërat po shkojnë shumë mirë”, ka thënë mes emocionesh Qaka për mediat norvegjeze.
Qaka do të zëvendësojë Amir Abrashin, i cili ende nuk është rikuperuar nga dëmtimi.
