Pas akuzave të forta ndaj qeverisë nga foltorja e Kuvendit, deputeti socialist, Erjon Braçe ka nxjerrë fotografinë e deputetit të PD-së, Luan Baçi, me grumbulluesit e shalqirit në zonën e Fierit. Sipas tij, janë mbledhur ditën e djeshme në një kafe për të ulur çmimin e shalqirit, duke përfituar në kurriz të bujqëve. Deputeti socialist tha më tej se ajo që ndodh me çmimin e shalqirit këtë vit, është tërësisht politike.
“Doni të dini se si sillen grumbulluesit? Ku është ai deputeti i Fierit, i PD-së? E fundit, si shkoi Samiti i Fierit dje me Donin, me Ramirin dhe me Tomato.al, do ta çojnë çmimin e shalqirit 4 lekë apo s’do ta çojnë këta? Ja ministre këta, që ju mendoni se po bëjnë bujqësisë në këtë vend dhe ndihmojnë bujqit, këta po ndjekin politikën. Ajo që ndodh me çmimin e shalqirit këtë vit është tërësisht politike. Ja ku i keni të tre, shikojini dhe pyetini. Ku kanë ngrënë dhe ku kanë pirë dje. Jo i madhi fare i Donit se ai është duke ngrënë peshk në Lushnje”, tha Braçe.
