Presidenti rus Vladimir Putin ka nënshkruar një ligj që do t’u lejojë autoriteteve të listojnë mediat e huaja që veprojnë në Rusi si “agjentë të huaj”, njoftoi agjencia e lajmeve RIA.
Ndërkohë më parë Dhoma e ulët e Parlamentit rus aprovoi amendamentin që i hapi rrugën etiketimit të medieve që financohen nga jashtë vendit, si agjentë të huaj. Ligji kaloi dhe në dhomën lartë pa pësuar ndryshime.
Ministria ruse e Drejtësisë ka dërguar letra në nëntë media për regjistrimin e tyre të mundshëm si agjentë të huaj. Zëri i Amerikës dhe Radio Evropa e Lirë janë mes atyre që mund të njihen si agjentë të huaj.
Ministria gjithashtu i dërgoi letra administratës së faqeve të internetit në Kaukaz, Siberi dhe Krime si Kavkaz.Realii, Krym Realii dhe Sibir Realii, si dhe Radio Azatliq.
Kjo është një kundërpërgjigje e Moskës ndaj vendimit të Departamentit amerikan të Drejtësisë, për të regjistruar si “agjente” firmën që financon degën amerikane të televizionit rus “RT”.
Nuk e specifikon se cilat media do të shpallen si agjente, apo sesi do të funksionojë procesi. Mediet e përfshira në listën e zezë do t’u nënshtrohen të njëjtave rregulla që aplikohen aktualisht ndaj organizatave joqeveritare të financuara nga jashtë, mbi bazën e një ligji të miratuar në vitin 2012.
Qeveritë perëndimore kritikuan ashpër ligjin dhe thanë se ishte një përpjekje e Moskës për t’u veçuar nga vala e revolucioneve në Evropë dhe Lindjen e Mesme. Këtyre grupeve u kërkohet të raportojnë mbi financimet dhe bëhen objekt inspektimesh nga autoritetet.
Në SHBA, grupet e përcaktuara si agjentë të huaj duhet të raportojnë në Departamentin e Drejtësisë lidhur me financimet e të japin informacione të rregullta mbi aktivitetet e tyre. TIRANA TODAY
