Një ditë pas ngjarjes së rëndë që ndodhi ditën e djeshme në kanionet e Holtës, ku u mbyt një vajzë 25-vjeçare, vjen reagimi i kreut të Zjarrfikëses në Gramsh, Ilir Llapushi.
Përmes një komunikimi për mediat, Llapushi shprehet se është marrë një vendim i rëndësishëm nga autoritetet lokale, duke theksuar se kjo zonë tashmë konsiderohet si një vend i rrezikshëm, dhe deri në një vendim të dytë do të qëndrojë e mbyllur.
Ndër të tjera, rrëfeu momentin e shpëtimit të fëmijëve që humbën kontaktet me prindërit, ndërsa tha se u njoftuan nga turistë të rastësishëm për kaosin e krijuar
“U njoftuam nga turistë të tjerë se disa turistë po mbyteshin. Erdhëm menjëherë dhe u futëm mes dallgëve tq shumta për të shpëtuar turistët. Siç i keni parë edhe në pamje, fëmijët i morëm në krahë, në qafë dhe i nxorëm.
Kur erdhëm ne vajza sipas parashikimeve tona ishte mbytur, por ne shpresonim të ishte gjallë. Sot ka akoma turistë, kjo është diçka e frikshme. Do të lëmë një njeri këtu që të bëjë bllokimin e turistëve, pasi koha po acarohet”, deklaroi Llapushi.
