Kreu i ALUIZNI-t, Artan Lame, ka reaguar për kthimin e ligjit të Kadastrës në Kuvend, nga presidenti Ilir Meta për rishqyrtim. Në një konferencë për shtyp, Lame iu drejtua ashpër presidentit Meta, duke i kujtuar këtij të fundit se Presidenca që ai drejton, por edhe institucionet që ka qenë më parë, nuk janë të regjistruara. Për pasojë, nuk kanë certifikatë pronësie.
“Dje Presidenti i Republikës ktheu për shqyrtim ligjin për Kadastrën. Por dua t’i kujtoj Presidentit se godina e Presidencës, nuk ka certifikatë pronëse. Më parë Ilir Meta ka qenë kryetar Kuvendi, por edhe Kuvendi nuk ka certifikatë.
Më parë Meta ka qenë edhe Ministër i Jashtëm, por as kjo nuk ka certifikatë. Më parë Ilir Meta ka qenë edhe kryeministër, por edhe Kryeministria nuk është e regjistruar, dhe nuk ka as certifikatë pronësie.
Këto janë punët me të cilat do të merret Kadastra, që dje presidenti i ktheu mbrapsht si të rrezikshme. Si t’ua shpjegojmë hallin e presidentit 60 mijë familjeve që presin të mbyllin procesin e legalizimeve, fermerëve që duan të regjistrojnë tokën.
Si t’ua shpjegojmë 50 mijë familjeve që presim të ligjërojnë ndërtesat e vjetra. Kthimi i ligjit të Kadastrës penalizon çdo shqiptar që ka problem me pronën. E admiroj aftësinë e Presidencës për të mbushur 14 faqe për ligjin dhe nuk argumenton asgjë.
Njërin prej shqetësimeve do më lejoni ta analizoj. Presidenti shkruan se kryeministri merr atributet. Kaq u desh që ato portalet të shkruajnë se Edi Rama po grabit regjistrin e pronave.
Veç kësaj unë u përpoqa të bëj disa verifikime. Garantoj z. president se punonjësit e Kadastrës do të paraqiten në zyrën e Presidencës, për të lëshuar certifikatat e pronësisë”, tha Lame.
