Virgil Van Dijk beson se Liverpool ka gjithçka i duhet për të dominuar Premier Ligën për shumë vite dhe ai shpreson që të kujtohet si një legjendë në “Anfield Road”. Mbrojtësi holandez është shndërruar në një nga më të fortët në qarkullim pas transferimit nga Southampton në janar 2018 për shifrën rekord të 75 milionë paundëve.
Ai luajti një rol shumë të rëndësishëm në triumfin në Champions sezonin e shkuar, ndërsa këtë sezon “Reds”-at janë vetëm 6 pikë larg titullit të parë kampion pas 30 vitesh. Duke folur për gazetën katalanase “Sport”, Van Dajk tha:
“Unë dua që të kujtohem si një legjendë e Liverpool. Dua të arrij gjëra të pabesueshme këtu. Ne kemi një skuadër fantastike, nuk na mungon asgjë dhe i kemi të gjitha mjetet e nevojshme për të vazhduar të fitojmë.
Kemi një trajner me të cilin identifikohemi, një skuadër me shumë kualitet, një stil loje që ushqen fitore, një stadium dhe tifozë që luajnë pjesën e tyre. Do të më pëlqente të isha një nga ata lojtarë që do rikthehesha në ‘Anfield Road’ pas tërheqjes. Shoh legjenda të klubit në ndeshje dhe ndihem pjesë e një familje të madhe të vërtetë”.
28-vjeçari i rritur te Nac Breda, luajti për akademinë e fqinjëve të Willem II përpara se të transferohej te Groningen, ku ai qëndroi derisa firmosi me Celtic në Skoci.
