15 mjekë të specialiteteve të ndryshme në Spitalin Rajonal të Beratit kanë mbushur moshën dhe kanë dalë në pension, por ata vijojnë të qëndrojnë në punë.
Arsyeja? Mungesa e mjekëve të rinj. E në këtë rast, vlen ajo shprehja: punë ka, por duhen profesionistë.
Por, ku janë profesionistët e Beratit? Apo nuk ka të tillë ky qytet? Në fakt ka, por edhe pse kanë përfunduar studimet për Mjekësi, ata kanë zgjedhur të largohen.
Jo drejt kryeqytetit, por jashtë shtetit. Teksa mungesa e profesionistëve është një problem i madh tashmë në Spitalin Rajonal të Beratit, të rinjtë kanë zgjedhur mbase të punojnë jo në profesionin e tyre jashtë shtetit, por të bëjnë një punë tjetër që mbase paguhet më mirë.
Drejtuesi i këtij spitali, Iraid Frashëri ka thënë se të rinjtë e diplomuar nuk kthehen në Berat për të ushtruar profesionin e tyre, por janë larguar drejt Gjermanisë.
Të pashpresë për gjetjen e një zgjidhjeje të kësaj situate, drejtori i Spitalit Rajonal të Beratit, Iraid Frashëri i bën apel Ministrisë së Shëndetësisë për të gjetur një zgjidhje.
Tashmë, duket se në Berat nuk vlen më shprehja “punë ka, por duhen profesionistë”, por vlen shprehja “punë ka, por profesionistët kanë ikur jashtë shtetit”.
