PSG duket se nuk e ka problem të fitojë në ndeshjet e Liga 1 edhe kur nuk ka në formacion të gjithë yjet e ekipit. Në përballjen e kësaj jave ku fituan 2-0 në transfertë e Troyes, parisienët luanin pa Cavani, Mbappe, Marquinhos, Dani Alves dhe Verratti, të lënë pushim nga trajneri Unai Emery dhe pa Neymar të dëmtuar.
Kur mbeten edhe 10 javë për tu luajtur PSG duket se e ka siguruar tashmë titullin kampion, duke parë edhe diferencën prej 14 pikësh me Monaco që ndodhet në vendin e dytë. Tashmë ata mund të përqendrohet te sfida e Champions League kundër Real Madrid, ku të martën në “Parc des Princes” do të synohej përmbysja e humbjes 3-1 të pësuar tri javë më parë në Spanjë.
Goli i parë në fushën e Troyes, erdhi në minutën e parë të pjesës së dytë dhe u firmos nga Angel Di Maria. Argjentinasi mori një pasim të shkëlqyer nga qendërsulmuesi i “improvizuar” Julian Draxler dhe mposhti portierin vendas duke e kaluar topin sipër trupit të tij. Ky ishte goli i nëntë i Di Maria në këtë sezon.
Ndërkohë, dhjetë minuta Christopher Nkunku, sulmuesi 20-vjeçar, realizoi golin e dytë për miqtë në ndeshjen e tij të parë si titullar në Ligue 1. Pas kësaj humbje Troyes mbeten në zonën e ftohtë dhe ndan vendin e fundit të disponueshëm për të qëndruar në “elitë” bashkë me Toulouse dhe Angers.
