Paris Saint-Germain ka fituar 6-2 kundër Bordeaux në javën e tetë të kampionatit francez. Ndeshja e luajtur në “Parc des Princes” ka qenë një festë e golit dhe spektaklit. Neymar ka hapur shfaqjen me një gol të mrekullueshëm me goditje dënimit. Shtatë minuta më vonë ka qenë Cavani, i shërbyer pikërisht nga braziliani, që ka dyfishuar avantazhin për vendasit, të cilët kanë shënuar edhe golin e tretë në minutën e 21-të me Meunier.
Pas një pauze prej 19 minutash dhe një goli të realizuar nga miqtë në minutën e 31-të me Sankhare, PSG ka gjetur rrugën e rrjetës edhe dy herë të tjera në fundin e pjesës së parë. Neymar ka shënuar nga pika e bardhë në të 40-ën, teksa Draxler ka realizuar golin e pestë në të 45-ën. Një arritje historike kjo për Parisin që nuk kishte realizuar kurrë më parë pesë gola në pjesën e parë në një ndeshje të kampionatit.
Në pjesën e dytë ka ardhur edhe goli i Mbappe, i cili ka fiksuar shifrat në 6-1. Në minutën e 89-të ka ardhur edhe goli i dytë për “dallëndyshet”, i realizuar nga Malcom me penallti. Falë kësaj fitoreje PSG është ngjitur në kuotën e 19 pikëve në kampionat, tri më shumë se Monaco që ka barazuar 1-1 në shtëpi kundër Montpellier.
https://www.youtube.com/watch?v=xpqOGLQKTwE&ab_channel=MATCHDAYHIGHLIGHTS
