Gjatë javës së fundit, ushtria izraelite ka bombarduar dy herë disa godina në Rripin e Gazës, për herë të parë që nga armëpushimi i arritur një muaj më parë pas luftës së shkurtër disaditore në muajin maj. Sulmet e ushtrisë izraelite, ishin një kundërpërgjigje ndaj lëshimit të tullumbaceve me gaz drejt territoreve izraelite nga grupet e armatosura të Rripit të Gazës. Ato u lëshuan nga milicët e grupeve të vogla të armatosura në Gaza, me synim shkaktimin e zjarreve dhe dëmtimin e arave bujqësore në Izraelin e Jugut.
Tollumbacet ndezëse, janë një armë shumë elementare dhe mjaft e thjeshtë për t’u ndërtuar, por ato mund të shkaktojnë dëme të konsiderueshme. Nuk është hera e parë që milicët palestinezë e përdorin këtë lloj arme për të goditur Izraelin.
Edhe në të kaluarën ata kishin përdorur një armë të ngjashme, që megjithatë kishte provokuar reagime më pak të dhunshme nga pala izraelite. Lëshimi i tollumbave me gaz këtë jave, ishte përgjigje ndaj një demonstrate nacionaliste të organizuar nga e djathta izraelite në Jeruzalem ditën e martën, për të përkujtuar pushtimin e qytetit në vitin 1967 pas luftës gjashtë ditore.
Ajo duhej të mbahej muajin e kaluar, por u anulua për shkak të frikës se mund të nxiste përplasje të mëtejshme. Gjithsesi deri më tani, as tullumbacet me gaz të grupeve të armatosura palestineze dhe as bombardimet e ushtrisë izraelite, nuk kanë shkaktuar fatmirësisht të vdekur, por vetëm dëmtime në godina dhe ara bujqësore.
Po si prodhohen këto armë artizanale?
Bëhet fjalë për tullumbace normale të mbushura me helium, dhe të mbledhura së bashku në grupe. Tek ato lidhet një copë pëlhure e lyer me benzinë, të cilës i vihet flaka. Më pas ato lëshohen të fluturojnë mbi kufirin me Izraelin, duke përdorur erërat që fryjnë drejt tokës nga Deti Mesdhe.
Sapo mbërrijnë në territorin izraelit, ato shkaktojnë zjarre të mëdha, pasi zona kufitare me Rripin e Gazës është shumë e thatë, dhe përbëhet kryesisht nga toka bujqësore dhe rezerva natyrore. Por falë erës, ato mund të arrijnë edhe në zona të banuara dhe të shkaktojnë dëme në godina por edhe në njerëz.
Sipas gazetave izraelite, tullumbacet e lëshuara të martën shkaktuan të paktën 40 zjarre në Izraelin Jugor, ndërsa të enjten vetëm 8. Në të dyja rastet nuk pati lëndime në njerëz. Një zëdhënës i ushtrisë izraelite, tha se më shumë se 4200 hektarë tokë janë djegur në Izrael që nga viti 2018 për shkak të armëve të tilla zjarrvënëse, pa llogaritur dëmet e javës së kaluar.
Po pse tollumbace dhe jo raketa?
Armët kryesore të përdorura nga milicët palestinezë për të sulmuar Izraelin, janë raketat me rreze të shkurtër veprimi, zakonisht të lëshuara nga toka. Rreth 4 mijë prej tyre u lëshuan gjatë luftës së muajit maj.
Por 90 për qind e tyre u përgjuan nga sistemi i mbrojtjes anti-raketore “Iron Dome” (Kupola e Hekurt), që e llogarit trajektoren e një rakete me rreze të shkurtër veprimi që nga momenti kur lëshohet nga Gaza, dhe parashikon gati në moment, nëse ajo po drejtohet apo jo drejt një zone të populluar.
Nuk dihet saktësisht se sa raketa kanë pasur në zotërim grupet e armatosura palestineze vitet e fundit, duke pasur parasysh edhe embargon e vendosur nga Izraeli mbi Rripit e Gazës. Por sipas shërbimit sekret izraelit, palestinezët kanë rreth 30 mijë raketa dhe predha mortajash. Raketat interceptohen gati gjithmonë nga Izraeli.
Nga ana tjetër, balonat janë më të lira dhe të thjeshta për t’u prodhuar, dhe mund të shkaktojnë dëme në territoret izraelite. Nuk është dëmi serioz siç mund të shkaktojnë raketat, por sërish shërben për të ushtruar presion mbi Izraelin.
Burimi i lajmit: ilpost.it. Përshtatur nga TIRANA TODAY
