Tajfuni më i fortë që ka goditur Japoninë në më shumë se 25 vjet ka lënë gjurmët e shkatërrimit në të gjithë vendin, ka shkaktuar mbylljen e një aeroporti të madh ndërkombëtar dhe hedhjen në erë të makinave, çatitë e shtëpive, etj.
E ndërtuar për të mbijetuar
Japonia është shumë e ekspozuar ndaj tajfunëve si edhe lëkundjeve të tërmeteve, që do të thotë se përballet me një numër të madh fatkeqësish natyrore të të gjitha llojeve.
Qoftë nga tërmetet, tsunamit, tajfunet ose shpërthimet vullkanike, pjesa më e madhe e qyteteve japoneze janë shkatërruar dhe rindërtuar vetëm brenda shekullit të 20-të.
Kjo u ka dhënë mundësinë për të planifikuar dhe për t’u përgatitur për ngjarjet e ardhshme dhe shuma të mëdha parash janë investuar në ndërtimin e infrastrukturës për të përballuar gjithçka që natyra hedh mbi to.
“Japonia është një nga shembujt botëror për gatishmërinë dhe reagimet emergjente, ashtu edhe në ndërtimin e infrastrukturës së qëndrueshme”, tha Marc Forni, eksperti kryesor në menaxhimin e rrezikut nga fatkeqësitë në Bankën Botërore.
Rrugët dhe ndërtesat publike në qytetet bregdetare si Osaka janë të projektuara për të lejuar që ujërat e tepërta dhe reshjet të rrjedhin në mënyrë efikase dhe mbrojtjet e sofistikuara në bregdet mund të zvogëlojnë rrezikun e avancimit të stuhisë.
Ndoshta më e rëndësishmja nga të gjitha, është fakti që ndërtesat private janë ndërtuar në mënyrë të tillë që të jenë shumë rezistente ndaj fenomeneve natyrore.
“Kodi i ndërtimit dhe zbatimi i kodit të ndërtimit, janë shumë me rëndësi”, tha Forni.
Ndërgjegjësimi në një moshë të vogël
Më 1 Shtator të vitit 1923, një tërmet me magnitudë 7.9 goditi Fushën Kanto të Japonisë, duke rrafshuar qytetet pranë Tokios dhe Yokohamas. Të paktën 100,000 njerëz u vranë dhe shkatërrimi thuhet se ishte aq i plotë saqë qeveria po konsideronte të ndërronte kryeqytetin.
Data 1 Shtator është shënuar si Dita Kombëtare e Parandalimit të Fatkeqësive në të gjitha shkollat dhe administratën e Japonisë. Fëmijët trajnohet me mënyrën si duhet të reagojnë kur një fatkeqësi e madhe natyore godet vendin dhe mësojnë për historinë e katastrofave të ndodhura ndër vite.
“Ka ndërgjegjësim të popullsisë në lidhje me mënyrën si duhet të përballohen katastrofat”, tha Forni, “dhe ka respekt për rreziqet natyrore”.
“Duke punuar me sistemin arsimor, ndërgjegjësimi është bërë pjesë e identitetit të studentëve japonezë dhe ata dinë si të reagojnë. Të gjithë trajnimet dhe stërvitjet krijojnë një reagim të fortë kur ndodhin fatkeqësitë”.
Para se tajfuni “Jebi” të godiste, Japonia lëshoi më shumë se 1.2 milionë njoftime për evakuim, asnjëra prej të cilave nuk ishte e detyrueshme. Megjithatë, personat e intervistuar nga televizioni japonez NHK thanë se ishin të lumtur që i kishin dëgjuar thirrjet për evakuim. “Shtëpia jonë është rrëzë një mali” , tha një grua për stacionin televiziv. “Është pak e rrezikshme kështu që ne vendosëm të iknim”.
Një mësim për të tjerët?
Përtej ndërgjegjësimit publik dhe kodeve të ndërtimit, qeveria japoneze gjithashtu paraqet një shembull për botën se si Ministritë dhe insititucione të ndryshme punojnë së bashku në rast të një katastrofe.
Por zyrtarët kanë investuar gjithashtu kohë dhe përpjekje në përgatitjen e marrëveshjeve me sektorin privat në mënyrë që, sapo të shohin shenjat e para të një katastrofe, kompanitë private që mund të ndihmonin me përgjigjen ndaj katastrofave e dinë se cilat janë përgjegjësitë e tyre.
“Duhet shumë forcë institucionale, kohë dhe përpjekje për të qenë në gjendje të ndërtosh marrëveshje të tilla dhe për ta bërë këtë një prioritet kombëtar që sjell fryte”, tha Forni.
Ndërkohë që, shanset janë që pasoja shumë më katastrofike do të kishin ndodhur nëse një tajfun si “Jebi” do të godiste një zonë bregdetare në ndonjë vend tjetër të botës.
“Japonia dëshmon edhe njëherë që nëse një katastrofe natyrore godet nuk duhet të çojë në një numër të madh viktimash ose humbje të aseteve ekonomike”, tha Forni.
“Duke investuar në projektimin inxhinierik dhe në zbatimin e kodeve dhe standardeve, ajo tregon se pasojat mund të jenë mjaft të reduktuar në krahasim me atë çfarë do të ndodhte në shumicën e vendeve të tjera në botë”./tvklan.al /
