Nga Klaudia Malaj/Sot politika preferoi të luante role të ndryshme përpara trupës së shkëlqyer të artistëve shqiptarë të cilët u thinjën dhe humbën jetën në skenën shqiptare.
Duke tundur ligjet dhe duke treguar projektet me fjalë menduan se do i mbushej mendja artistëve se çfarë risie do të sillte ndërtimi i Teatrit, kur të gjithë nën zë, e thonë se aty përveçse godinës do të ndërtohen edhe disa kulla të cilat janë në dobi të porositësve.
Një ditë pas reagimit të Presidentit të Shqipërisë Ilir Meta i cili ftoi Qeverinë dhe Bashkinë e Tiranës që të ulet dhe të dëgjojë artistët në lidhje me shembjen e teatrit, kryebashkiaku Erion Veliaj iu përgjigj pozitivisht kërkesës. Një ditë e gjatë me debate dhe konfrontime mes Veliajt së bashku me planin për teatrin, dhe artistëve të cilët e kundërshtojnë fuqimisht ndërtimin e tij.
Në dëgjesën e sotme mori pjesë edhe ministrja Kumbaro. Ndryshe nga herët e tjera ministrja, e cila duhet të jepte zgjidhje për çdo paqartësi të artistëve, preferoi të heshtte apo të thoshte disa fjalë pa mikrofon. Nga artistët është pritur me kohë një reagim nga Kumbaro, por edhe sot ajo u “mbështet” pas shpatullave të Veliajt dhe nuk tregoi asgjë.
Rolin e moderatorit e mori vetë kryebashkiaku i cili në fjalën e tij u shpreh se, ndërtimi i teatrit është një nga projektet më ambicioze në 13 vite. Sado ambiciozë qoftë, vetë artistët e dinë shumë mirë se për çfarë po prishet teatri dhë se çfarë do të ndërtohet./AlpeNews.al
