Disa prej aleatëve politik të Partisë Socialiste, u shprehën të gatshëm të jenë në krah të saj në garën zgjedhore të 25 qershorit. Vendimi u mor gjatë një takimi që drejtuesit e disa forcave të majta, Petro Koçi, Idajet Beqiri dhe Gjergj Koja, zhvilluan sot me kryesocialistin Edi Rama dhe deputetin Musa Ulqini.
Në përfundim të takimit, Kreu i PSV-së Petro Koçi i bëri thirrje elektorarit të partive aleate të PS-së, t’ia japin kësaj të fundit votën e tyre, me argumentin se “çdo votë për partitë e vogla dëmton koalicionin”.
Ai ftoi edhe aleaët e tjerë të PS-së t’i bashkohen këtij qëndrimi.
“Ne tërhiqemi nga regjistrimi. I bëjmë thirrje edhe Milos dhe Gjinushit të tërhiqen. Mbështesim PS për 71 mandate në zgjedhje. Votat për partitë e vogla dëmtojnë fitoren e PS”, deklaroi Koçi.
Sakaq Kreu i PSD-së, Skënder Gjinushi, në një intervistë televizive, deklaroi se ‘PS-ja e ka të pamundur fitoren me 71 deputetë pa mbështetjen e aleatëve, dhe se afati ligjor për të tërhequr regjistrimin, ka ngrirë. Ne nuk tërhiqemi nga zgjedhjet”, bëri të ditur ai.
Edhe Paskal Milo nuk e ka pritur mirë apelin e Koçit. Kreu i PDS-së, tha: “S’e kuptoj se pse Zoti Koçi bëhet zëdhënës i PS. Kur ka dashur PS dhe Zoti Rama, të më ftojnë, më kanë ftuar. I dinë adresat dhe telefonin. Unë për kulturën që kam, nuk refuzoj ftesat”.
“Nuk mund të kthehemi në shërbëtor të dikujt që kërkon pushtet, dhe nuk ndajnë qeverisje në një kohë që s’kanë bërë asgjë”, shtoi Milo, teksa shfaqi dhe synimet pë këto zgjedhje, 1 mandat deputeti.
