Partia Socialiste kërkon sërish dorëheqjen e kreut të Komisionit Qendror të Zgjedhjeve, Klement Zguri.
Deputetja e PS-së, Klotilda Ferhati hodhi sot akuza ndaj Zgurit me anë të një deklarate për mediet, teksa tha se kreu i KQZ-së po shkel ligjin, duke iu referuar mandatit të kryebashkiakut të Mallakastrë.
Sipas Ferhatit, Zguri ka treguar njëanshmëri politike me mbrojtjen e Agron Kapllanajt.
“Partia Socialiste kërkon të shkarkohet kreu i KQZ-së, Klement Zguri. Ai ka shkelur ligjin duke mbrojtur Agron Kapllanajn, pasi kanë të njëjtat bindje politike. Sjellja e kryetarit të KQZ tregon për njëanshmëri politike”, tha ndër të tjera Ferhati.
Shkarkimin e Zgurit e kërkoi para dy ditësh edhe kreu i grupit parlamentar të Partisë Socialiste, Taulant Balla me anë të një postimi në Facebook.
Pas kësaj kërkesë, kreu i KQZ-së Klement Zguri, reagoi duke thënë:
Sulmet ndaj KQZ-së, sidomos kur janë haptazi abuzive, në kundërshtim të plotë me ligjin dhe të motivuara nga interesa politike të palidhura me KQZ-në dhe zgjedhjet, dëmtojnë rëndë autoritetin dhe pavarësinë e KQZ-së, mbjellin frikë dhe pasiguri tek institucionet, cënojnë shtetin ligjor. Këto janë ankorat që mbajnë KQZ-në përballë tallazeve. Nuk ka parti politike që njeh dhe pranon rregullat e lojës, zgjedhjet e ndershme dhe shtetin ligjor, që mund të ketë vulletin t’i këpusë këto ankora. Ndaj unë u bëj thirrje të gjitha palëve që lojën politike ta zhvendosin diku gjetkë, në ndonjë fushë ku interesit publik i bëjnë më pak dëm.
