Në 61 bashkitë e vendit do të ngrihen shtabet elektorale të të gjitha niveleve nga Asambleja Kombëtare e Partisë Socialiste.
Vendimi është marrë në Asamblenë Kombëtare të shtatorit ku u vendos ngritja e strukturave koordinuese elektorale në qarqe, bashki, ZAZ, njësi administrative dhe në organizata socialiste, ku kërkohej dhe caktimi i koordinatorëve elektoralë.
Periudha shtator-dhjetor 2018 shërbeu për zgjedhjen e koordinatorëve elektoralë në të gjithë vendin. Kështu, pranë çdo qarku do të ngrihet Këshilli Koordinues i partisë në qark, i cili duhet të organizojë dhe monitorojë punën për ngritjen e strukturave koordinuese elektorale të të gjitha niveleve.
Brenda datës 30 shtator 2018, Këshilli Koordinues duhet të caktonte koordinatorët elektoralë të organizimit digjital, të emigracionit, të Forumit të Grave Socialiste, të Forumit Rinor Socialist në shkallë qarku sipas propozimeve të ardhura nga drejtuesi politik i qarkut, raporton BË. Vendimi i Asamblesë ka përcaktuar dhe kriteret që duhet të përmbushë kandidati koordinator.
Asambleja kishte përcaktuar që kandidati nuk duhet të ketë qenë i dënuar për kryerjen e një vepre penale dhe të mos jetë nën hetim nga organet ligjzbatuese; të ketë integritet të lartë moral dhe profesional si dhe të transmetojë etikë në sjellje; të jetë figurë e njohur shoqërore në zonën përkatëse, të ketë njohje të mirë të komunitetit (kulturës, njohjes së familjeve, fiseve, përkatësive fetare, etnike etj.); të ketë aftësi komunikuese në transmetimin e bindjeve të tij; koordinatori mund edhe të mos jetë anëtar i partisë etj.
