Ish-korrespondentja dhe redaktorja e RTS-së, Vera Rankoviç ka publikuar një fotografi duke bërë simbolin shqiptar, shqiponjën, me dy duar.
Këtë gjest, shtetasja serbe e bëri në përkrahje të një furrtari shqiptar në Serbi, i cili u përzu nga Beogradi, për shkak se bëri shqiponjën me dy duar.
Teksa ka publikuar foton e saj në Facebook, Rankoviç shkruan se kjo është përgjigja e saj ndaj fashistëve nga Borça.
“Kjo është përgjigja ime ndaj fashistëve nga Borça. Ftoj të gjithë ata të cilët janë neveritur nga ajo që i ka ndodhur bashkëqytetarit tonë që këtë ta shprehni në këtë mënyrë”.
Kjo fotografi ka shkaktuar bujë të madhe, ndërsa gazeta serbe alo.rs, e konsideron një provokim. Të shumta kanë qenë komentet në fotot e publikuara nga ish-korrespondentja, ku shkruhet:
“Po të ishit të shkolluar, do ta njihni atë që është fashist… dhe çfarë është nazizmi. Dhe ndoshta do ta dinit se çfarë po bëni, ju i keni pak mend në kokë”, i shkruan një komentues.
Por ka patur edhe nga ata që kanë vlerësuar gjestin e saj dhe i shkruajnë: “Bravoooo Vera!”.
