Përfaqësuesi ligjor i presidentit, Bledar Dervishaj, ka pretenduar se Kuvendi ka manipuluar provat. Dervishaj tha se janë tjetërsuar fjalët në pretendimet e presidentit. Po kështu, Këshilltari i Presidentit, Bledar Dervishaj u shpreh se Presidenti do t’i drejtohet Prokurorisë, për çështjen e manipulimit të provave nga ana e Kuvendit të Shqipërisë.
“Sot u mbyll seanca e iniciuar në mënyrë të padrejtë nga Kuvendi. Për fat të keq u provua dhe sot se Kuvendi në përmbushje të qëllimeve politike, depozitoi prova të manipuluara vetëm që të rrëzoheshin pretendimet e Kreut të Shtetit. Kur kjo ndodh nga Kuvendi i Shqipërisë, imagjino çfarë mund të mendojmë ne si qytetarë se çfarë ndodh në organe të tjera.
Presidenti ka vendosur ti drejtohet Prokurorisë lidhur me këtë çështje. Ashtu sikundër është në të drejtën e Kuvendit, që të fillojë një procedurë hetimore parlamentare për këtë fakt që ne evidentuam. Edhe e drejta e gjykatës të marrë një vendim, por që të jetë i bazuar në Kushtetutë dhe ligj”, tha Derivshaj.
Përfaqësuesja e Kuvendit, Klotilda Bushka ka deklaruar se Meta u përfshi në fushatë gjatë zgjedhjeve të 25 prillit, duke mbajtur anë. Sipas saj, shkeljet e Kreut të Shtetit janë të rënda, pasi ka ndërhyrë në fushatë, ka sulmuar ndërkombëtarët si dhe ka nxitur dhunë.
“Presidenti ka qenë aktiv në fushatë, duke marrë anësi. Këto janë ndërhyrje në procesin zgjedhur. Presidenti ka tejkaluar kompetencat e veta. Presidenti ka sulmuar përfaqësuesit e huaj. Presidenti ka bërë deklaratat që kanë nxitur dhunë.
Presidenti ka humbur rolin e të parit të shtetit, atë të unitetit të popullit. Shkeljet e tij janë të rënda. Shkelje që lidhen me integritetin, rendin e sigurinë, shkelje që lidhen me marrëdhniet me jashtë”, tha Bushka.
