Protestuesit e zemëruar që sulmuan rezidencat zyrtare të Presidentit dhe Kryeministrit të Sri Lankës, ia dolën t’i detyronin ata të jepnin dorëheqjen në fundjavë, ndërsa vendi po futet më tej në krizë.
Megjithatë, protestuesit thonë se nuk do të largohen nga shtëpitë luksoze, derisa të dy liderët të kenë lënë postet e tyre. Presidenti Gotabaya Rajapaksa pritet të japë dorëheqjen të mërkurën, ndërsa kryeministri Ranil Wickremesinghe postoi në Twitter dorëheqjen e tij të shtunën, por nuk konfirmoi datën e largimit të tij.
Dorëheqjet shënojnë një fitore të madhe për protestuesit, por e ardhmja e 22 milionë njerëzve të vendit është e pasigurtë, pasi ata luftojnë për të blerë mallra bazë, karburant dhe ilaçe.
Ku është lëvizja protestuese tani?
Gjatë fundjavës, dhjetëra mijëra protestues u mblodhën jashtë zyrës dhe rezidencës së Presidentit, përpara se të thyenin kordonët e sigurisë.
Imazhet befasuese të shpërndara në mediat sociale i tregojnë ata duke kënduar këngë proteste, dhe duke brohoritur slogane, duke bërë thirrje që Rajapaksa të japë dorëheqjen. Pamjet më dramatike treguan protestuesit duke notuar në pishinën private të Presidentit.
Më vonë të shtunën, protestuesit shënjestruan shtëpinë e Wickremesinghe, duke i vënë flakën rezidencës së tij private në Fifth Lane, një lagje e pasur në kryeqytet. Një video e drejtpërdrejtë e parë nga CNN tregoi se ndërtesa u përfshi nga flakët, ndërsa turmat u mblodhën në vendngjarje dhe brohoritnin.
Të paktën 55 persona u plagosën në protesta, sipas mjekëve lokalë të shtunën, të cilët thanë se shifra përfshinte një ligjvënës nga Sri Lanka lindore dhe tre persona me plagë me armë zjarri. Protestat janë përshkallëzuar në Sri Lanka që nga marsi, kur zemërimi publik shpërtheu në rrugë për rritjen e kostove të ushqimit, mungesat e karburantit dhe ndërprerjet e energjisë elektrike, ndërsa vendi përpiqej të bënte shlyerjen e borxhit.
Burimi i lajmit: CNN. Përshtatur nga Tirana Today
