Aleati i Partisë Demokratike, Fatmir Mediu ka mbledhur sot drejtuesit e degëve të kësaj force politike për të organizuar zhvillimin e protestave.
Mediu bëri me dije se do t’i kërkojë Bashës ndërtimin e një shtabi opozitar për protestat dhe veprimet që do të ndërmarrë pakica parlamentare.
“Opozita e hapur brenda vetes, duke krijuar lirinë e nevojshme për çdo njeri të mirë dhe të zotë, që të zgjedhë dhe të zgjidhet nëpërmjet konkurrimit të hapur, është ringritja dhe rruga e vetme drejt një qeverisje të drejtë.
Kthimi i Parlamentit në foltoren e qytetarëve, duke orientuar veten në çdo traditë, sjellje, apo virtyt shqiptar, familjar dhe kombëtar, duke folur për shqiptarët dhe me shqiptarët dhe jo për Ramën, do krijonte qartësisht diferencën ndërmjet të keqes së kësaj qeverie dhe të mirës e të virtytshmes që duan shqiptarët. Prandaj në këtë kohë është e rëndësishme që Partia Republikane të jetë pjesë e angazhimit dhe përballjes së bashku me shqiptarët në protestën kundër qeverisë. Do t`i kërkoj zotit Basha dhe kolegëve të opozitës që të ndërtohet një Shtab opozitar i protestës dhe veprimit opozitar.
Kjo të shtrihet në çdo nivel qendror dhe lokal. Kjo nuk është thjesht protestë e PD, PR apo LSI por e qytetareve, prandaj pjesëmarrja dhe vendimmarrja e përbashkët me intelektualë, studentë, biznesmenë, të përndjekur, pronarë, parti opozitare, është e domosdoshme”, ka thënë Mediu ndër të tjera.
