Qeveria është e gatshme të heqë nga VKM-ja nr.282 për ligjin e Arsimit të Lartë, pika 4 mbi tarifën për lëndët e mbartura.
Kështu u shpreh në një intervistë ekskluzive për Report Tv ministrja e Arsimit, Sporteve dhe Rinisë, Lindita Nikolla. Ajo shpjegon shqetësimet e studentëve të cilët zhvilluan një protestë përpara Ministrisë së Arsimit, kundër tarifës për provimet e mbartura.
Nikolla sqaroi se është e gatshme për të dialoguar, ndërsa shtoi se qeveria është e gatshme të shkojë drejt heqjes së tarifës nga VKM-ja dhe të jetë vetë universitetet dhe fakultetet ato që të vendosin lidhur me këtë tarifë nëse duhet aplikuar apo jo.
‘Shkaku i protestës ka qenë administratori i fakultetit të Arkitekturës që pa asnjë komunikim me stafin drejtues ka shpallur një datë fikse se kur duhen paguar tarifat. Mbetem e hapur, nëse vërtetë gjykojnë që kjo duhet hequr, patjetër, në nuk e bëjmë pjesë të VKM-së, është pjesë e vendimmarrjes së çdo fakulteti dhe universiteti. Studentët shqetësohen për një situatë hipotetike që do të japë efektet pas një viti… . Kërkesa tjetër që lidhet me përmirësimin e kushteve, është shumë e drejtë”.
