Prej orës 08:30, studentët kanë protestuar për afro dy orë në fakultetet përkatëse, e më pas rreth orës 10:00 kanë filluar grumbullimin e tyre para Kryeministrisë. Referuar paktit me universitetin, lançuar nga Rama, ata janë të mendimit se nuk është zgjidhur asnjë prej kërkesave.
Në protestën para Kryeministrisë, nuk kanë munguar dhe poezitë e studentëve për të shprehur revoltën e tyre ndaj klasës politike.
Njëri prej tyre zgjodhi vargje nga një nga kryeveprat e poetit nga Vlora, Ali Asllanit, poezia “Hakërrim”.
Hakërrim është një ndër poezitë më të bukura të poetit vlonjat Ali Asllani. Në “Hakërrim”, autori demaskon shtetarët servilë, hajdutë dhe tradhëtarë. Vepra është botuar pas viteve 90!
Studenti: Që nga Korça gjer te Shkodra mbretëron një errësirë,
nëpër fusha, nëpër kodra, vërshëllen një egërsirë!
Pra, o burra, hani, pini, hani, pini or’ e ças,
Për çakallin, nat’ e errët, është ras’ e deli ras’!
Hani, pini dhe rrëmbeni, mbushni xhepe, mbushni arka,
të pabrek’ ju gjeti dreka, milionier’ ju gjeti darka!
Hani, pini e rrëmbeni, mbushni arka, mbushni xhepe,
gjersa populli bujar t’ju përgjigjet: peqe, lepe!
