Vjen reagimi i Autoritetit të Dosjeve pas kallëzimit në Prokurori nga prokurori Bujar Sheshi, i cili u tha se ka qenë pjesë e Sigurimit të Shtetit me detyrë hetues dhe spiun në rini, me pseudonimin “Venusi”.
Kryetarja e Autoritetit të Dosjeve, Gentiana Sula, iu përgjigj interesit të medias pas një takimi me ambasadoren gjermane, teksa tha se u qëndron deklaratave të mëhershme dhe se janë bërë verifikimet e duhura.
“Jemi të hapur për çdo hetim, procesi ka qenë i drejte, janë marrë të gjithë masat”, tha Sula.
Sekretari i këtij institucioni hodhi poshtë edhe mundësinë e ngatërrimit të gjeneraliteteve, teksa tha:
“I kemi shkruar të vërtetës deri në fund, ka pasur probleme në gjeneralitetet e tij. Kemi pasur një shkresë që në emër të personit në fjalë është vetëm ky dhe asnjë tjetër dhe kjo gjë ka qenë vendimtare për ne.”
Po ashtu, kryetarja Sula shtoi se nga 30 figurat, 4 prej tyre janë zbuluar gjatë kohës së verifikimeve për organet e reja të drejtësisë.
“Në dy vite ekzistencë ka verifikuar të paktën 1500 figura, të cilët janë të gjithë zyrtarë shumë të lartë, natyrisht ashtu siç i ka ligji. Për organet e larta të drejtësisë kemi verifikuar rreth 550 figura dhe 4 prej tyre janë gjetur me probleme. Në dokumentet e sigurimit nga 1500 figura rreth 30 janë gjetur me probleme”, u shpreh Sula.
