Shqiptari i arrestuar një ditë më parë në Tiranë, rezulton të jetë një person sa i heshtur, aq dhe me rrezikshmëri të lartë në fushën e “hakimit” kompjuterik. Fieraku Aldo Ymeraj, 24-vjeç ka terrorizuar edhe FBI-në, pasi shërbente një një rrjet të madh hakerash, të cilët vepronin në të gjithë botën.
Aktiviteti ku bënte pjesë shqiptari merrej me shitjen e të dhënave të vjedhura të kartave të kreditit, ndërsa përftimi i grupit, ishte në shifra stratosferike.
“Mësohet se Aldoja është një tip i mbyllur dhe i vetmuar, madje shumë pak e shihnin edhe në lagjen “Konferenca e Pezës” ku jetonte, pasi pjesën tjetër të kohës e kalonte në internet, që vërteton edhe aktivitetin e tij”-shkruan BW. I riu nga Fieri, ka studiuar në shkollën artistike “Jakov Xoxa” në fushën e pikturës, por pak kush mund ta dinte se ai zotëronte informacione dhe ishte një gjeni në fushën kompjuterike.
Ndërsa ende nuk është e qartë se si përfundoi mes grupit të shumëkërkuar nga FBI që akuzohen se kanë përvetësuar nëpërmjet marifeteve të internetit 530 milionë dollarë, fqinjët tregojnë se i riu dilte shpeshherë jashtë shtetit, në Kosovë, Itali dhe Gjermani. Fqinjët shprehen se Aldo ka një gjendje ekonomike të zakonshme, madje thuhet të jetë ndaluar edhe në 2013-ën kur ishte vetëm 20 vjeç. Pas arrestimit të tij është marrë në pyetje nga policia e Fierit edhe nëna e tij, me profesion ekonomiste.
Si njihej fieraku, pseudonimi që mbante te grupi “In fraud we trust”
Në rrjetin ku ai bënte pjesë, “In fraud we trust”, 25-vjeçari njihej me epitetin “Kubanezi”. Aldo Ymeraj u prangos teksa po pinte kafe në një lokal në Tiranë për llogari të një flete arresti të lëshuar nga Shtetet e Bashkuara të Amerikës, që drejtuan në të njëjtën kohë një operacion disa shtetësh për të goditur hakeruesit që besohet se kryenin krime kompjuterike që prej 2010 .
Grupi ku Aldo Ymeraj ishte pjesë ka mundur të vjedhë 530 milionë dollarë, që përvetësoheshin përmes shitjes së të dhënave të vjedhura të kartave të kreditit.
Por i riu nga Fieri që prej arrestimit nuk ka thënë asgjë për autoritetet shqiptare ndërkohë që pritet që ai ti dorëzohet drejtësisë amerikane. Përveç Ymerajt janë edhe 12 të tjerë të arrestuar në Kosovë, Serbi, Itali, Francë, Shtetet e Bashkuara, Australi dhe Britani. Grupi mendohet se është themeluar nga 34-vjeçari ukrainas Svatoslav Bondareko i njohur me nofken “Rektori”, por vendndodhja e tij nuk është zbuluar ende. Nga ana tjetër, rusi Sergei Sergejeviç që mendohet se është njëri nga bashkëpunëtorët e tij më të ngushtë u arrestua gjatë pushimeve në Tajlandë.
