Kandidatura e presidentit Trump para dy viteve, shqetësoi shqiptarët, por edhe aleatët e tjerë tradicionalë të Amerikës. Një debat i ngjashëm zhvillohej edhe në Maqedoni. Diskutohej mundësia që Amerika të ndryshonte qëndrimin dhe raportet ndaj vendit dhe rajonit.
Kur bëhet fjalë për Maqedoninë dhe rajonin, profesori i së drejtës ndërkombëtare, Vilhard Shala thotë se administrata e re amerikane ka vazhduar politikën e njëjtë si dhe ka shtuar dinamikën e aktiviteteve për zgjidhjen e çështjeve të hapura në rajon dhe forcimin e demokracive parlamentare.
“Vizitat e shpeshta të diplomatëve amerikan në Maqedoni dhe rajon, janë dëshmi se SHBA-të duan një Ballkan të demokratizuar dhe stabil. Gjithashtu po zhvillohet një fushatë diplomatike për të penguar qëllimet destruktive dhe impaktin e Rusisë, për të minuar proceset euro-antlantike në rajon. Amerika është e pranishme në Ballkan, sikur asnjëherë më parë”, thekson Shala.
Prezenca e SHBA-ve në Ballkan
Sipas tij, para kësaj periudhe kohore prezenca e SHBA-ve në rajon ishte e vogël, për faktin menaxhimi i demokracive të rajonit menaxhohej nga Bashkimi Evropian.
Edhe profesori Bekim Kadriu thekson se, politika SHBA-ve ndaj Maqedonisë mbetet konsistente. Qëndrimi i tij është se politikat amerikane nuk ndryshojnë brenda natës. Analistët thonë se dërgimi i diplomati amerikan Hoyt Brian Yee në Ballkan nuk është rastësor. Ai është njeriu i Trumpit që ka filluar misionin e tij për stabilizimin dhe uljen e tensioneve në Maqedoni dhe rajonin e Ballkanin.
Karriera profesionale
Ai është një diplomat, i cili e njeh Ballkanin më shumë se kushdo tjetër. Në kohën e bombardimeve të NATO-s ndaj forcave të regjimit të diktatorit Millosheviç, ai ishte pjesë e Shtabit të Aleancës dhe Zëvendës Drejtor i Zyrës Private të Sekretarit të Përgjithshëm të NATO-s Havier Solana.
Nga viti 2002- 2005 Yee ka qenë zyrtar kryesor i diplomacisë në Mal të Zi, ndërsa në periudhën kohore 2006-2009 ai ishte Konsull i Përgjithshëm në Selanik të Greqisë. Para se të merrte detyrën e tij të tanishme në shtator 2013, ai ishte Zëvendësshef i Misionit në Ambasadën e SHBA në Zagreb, nga viti 2010 deri në vitin 2013.
Objektivat në Ballkan
Objektivat e tij, aktuale janë që të mundësojë transferimin e qetë të pushtetit në Maqedoni si dhe krijimin e një qeverie të re reformatore. Në Kosovë, kërkon një kryeministër të fuqishëm për shtyrjen e proceseve përpara, në Shqipëri futjen e PD-së, në zgjedhje. Diplomatin amerikan, Mali e Zi e do në NATO, ndërsa Serbisë i ka dhënë mesazhet e qarta./Ina
