Kombet e Bashkuara kanë paralajmëruar se Egjipti dhe Arabia Saudite së shpejti mund të sulmohen nga retë e karkalecave që po zhvendosen nga Sudani dhe Eritrea duke u përhapur me shpejtësi përgjatë dy anëve të Detit të Kuq.
sipas një paralajmërimi të FAO-s (Organizatës së Kombeve të Bashkuara për Ushqimin dhe Bujqësinë, qysh nga tetori i 2018, shirat e shumta në rajon kanë nxitur një valë shumimi të pazakontë të insekteve.
Eksperti i fenomenit, Keith Cressman, tha se tre muajt e ardhshëm do të jenë kritikë në mbajtjen e situatës nën kontroll, para se insektet të fillojnë të riprodhohen sërish në verë.
Studiuesit thonë se vetëm në një milje katror gjenden 80 milionë insekte, ndërsa shtrirja është në qindra kilometra katrorë. Çdo karkalec mund të hajë ushqim të përditshëm sa pesha e vet trupore, kështu që ata mund të përbëjnë një kërcënim apokaliptik për rezervat ushqimore.
“Një tufë shumë e vogël karkalecash ha të njëjtën sasi të ushqimit, në një ditë, sa nevojitet për rreth 35 000 njerëz. Karkalecat shkatërrojnë të mbjellat, kështu që ata përbëjnë një kërcënim të madh për sigurinë e ushqimit, veçanërisht në zonat tashmë të prekura”, paralajmëroi FAO.
Përktheu dhe përshtati TIRANA TODAY
