Në bazë të ndryshimeve Kushtetuese, Kryeprokurori zgjidhet nga Këshilli i Lartë i Prokurorisë. Deri më sot ky Këshill ka qenë i bllokuar, pasi Shoqëria Civile nuk kishte propozuar kandidatin për KLP-në, dhe për këtë arsye vetëm me votat e mazhorancës dy ditë më parë në Kuvend u zgjosh si kryeprokurore e përgjithshme e përkohshme Arta Marku.
E ndërsa ky proces tashmë është zhbllokuar pasi Avokati i Popullit ka zhvilluar këtë të mërkurë seanca dëgjimore për katër kandidatët e Shoqërisë Civile për Këshillin e Lartë të Prokurorisë.
Nga katër emrat do zgjidhet vetëm një me votën e Kuvendit, duke plotësuar kështu vakancën që mbante peng KLP-në prej 8 muajsh. Kandidatët Alfred Balla, Andi Murataj, Entela Hoxha dhe Mimoza Qinami u pyetën në seancën dëgjimore te AP dhe në përfundim të këtij procesi, dosja me katër emrat i është adresuar Kuvendit.
Zgjedhja e anëtarëve nga Shoqëria Civile zhbllokoi procesin e ngritjes së KLP. “Duhet të rikthehet besimi dhe aksesi i njerëzve në organin e Prokurorisë. Kam një eksperiencë 26-vjeçare në sistemin e drejtësisë si prokuror, avokat dhe këshilltar ligjor në Gjykatën e Lartë.
Po u zgjodha anëtar i KLP, pretendoj të bëhem dhe kryetar i KLP. Prokuroria të mos flejë gjumë mbi dosjet”, ka thënë përpara Avokatit të Popullit, kandidati për në KLP, Alfred Balla. Por menjëherë pas zgjedhjes së anëtarit në Kuvend që do të përfaqësojë Shoqërinë Civilë, Këshilli i Lartë i Prokurorisë do të nisë punën për zgjedhjen ë Kryeprokurorit të Përgjithshëm.
Sipas procedurës kryeprokurori i përgjithshëm zgjidhet si më poshtë
1. Prokurori i Përgjithshëm zgjidhet me tre të pestat e anëtarëve të Kuvendit, mes tre kandidatëve të propozuar nga Këshilli i Lartë i Prokurorisë, për një mandat 7-vjeçar dhe pa të drejtë riemërimi.
2. Këshilli i Lartë i Prokurorisë, bazuar në një thirrje publike dhe procedurë transparente, përzgjedh dhe rendit tre kandidatët më të kualifikuar dhe ia përcjell Kuvendit, sipas ligjit.
3. Prokurori i Përgjithshëm zgjidhet nga radhët e juristëve të spikatur, me jo më pak se 15 vjet përvojë pune, me integritet të lartë moral dhe profesional, që kanë përfunduar Shkollën e Magjistraturës ose kanë një gradë shkencore në drejtësi. Kandidati nuk duhet të ketë mbajtur funksione politike në administratën publike, ose pozicione drejtuese në parti politike gjatë 10 vjetëve të fundit përpara kandidimit.
4. Nëse Kuvendi nuk zgjedh Prokurorin e Përgjithshëm brenda 30 ditëve nga paraqitja e propozimeve, kandidati i renditur i pari nga Këshilli i Lartë i Prokurorisë shpallet i emëruar.
5. Pas përfundimit të mandatit dhe me kërkesë të tij, Prokurori i Përgjithshëm emërohet në detyrën e mëparshme ose gjyqtar në gjykatën e apelit.
