Pas arrestimit të 23 qytetarëve të Kukësit, Policia e Shteti ka proceduar penalisht edhe disa përfaqësues të Shoqërisë Civile. Anëtarët e shoqërisë Civile kanë protestuar para Drejtorisë së Policisë së Tiranës, ndërsa kanë kërkuar njëzëri lirimin e qytetarëve të arrestuar. Por, sot policia ka proceduar penalisht këta anëtarë, të cilët nuk kërkonin asgjë më shumë, por thjesht mbrojtjen e të drejtave themelore të njeriut.
Tirana Today kontaktoi me aktivisten, Alida Karakushi, e cila veprimet e policisë i konsideroi si “donkishoteske” dhe të papranueshme.
E pyetur se si e cilëson procedimin penal nga ana e policisë, Karakushi u shpreh: “Ne rast konkret po përdoret direket pushteti dhe po përdoren institucionet për të idimiduar qytetarët. Po sulmohet ajo shoqëri, e cila është e pakapur nga politika dhe nga organizatat e ndryshme. Këto veprime të pushtetit janë donkishoteske dhe të papranueshme”-tha Karakushi.
Gjithashtu aktivistja teksa iu referua rastit të procedimit, shtoi se kjo është një shenjë e pastër, që pushteti po frikësohet prej tyre. Sipas Karakushit, frika që ka kapur qeverinë është më shumë një nder për Shoqërinë Civile, ndërsa për këtë duhet falënderuar, shtoi mes tjerash ajo. Ne fund aktivistja Karakushi shtoi se veprimet e Policisë së Shtetit nuk e frikësojnë Shoqërinë Civile, por sipas saj, kjo frymëzon edhe më shumë aktivistë.
“Njëkohësisht këtu duket se qeveria po frikësohet nga ne që jemi realisht pa mbrojtje politike dhe militantë të asnjë partie. Ne jemi me sa duket frika kryesore e kësaj qeverie dhe duhet ta falënderojmë për këtë nder që po na bën. Unë e shikoj veten si një qytetare të angazhuar në mbrojtje të të drejtave njerëzore. Ne nuk frikësohemi nga kjo lëvizje e Policisë se Shtetit. Përkundrazi, frymëzohemi edhe më shume si aktiviste”-përfundoi ajo. TIRANA TODAY
