Në kryeqytet, sportelet e zyrave të gjendjeve civile kanë qenë të mbushura me qytetarë. Data 28 korrik ka qenë afati i fundit ligjor për të bërë ndryshimin e vendbanimit.
Duke marrë shkak nga situata e krijuar, edhe pse afati kohor për të përputhur adresën e banimit me njësinë ka qenë plot 6 muaj, Ministria e Brendshme do t’i propozojë Këshillit të Ministrave një draft të ri për shtyrjen e afatit të transferimit të lejeve të banimit.
Në janar të këtij viti, qeveria vendosi që brenda një periudhë 6-mujore ndryshimi apo deklarimi i vendbanimit të kryhej pa asnjë pagesë. Regjistrimi fillestar i vendbanimit apo ndryshimi i tij bëhet jo më vonë se 30 ditë nga ardhja në atë vendbanim.
Për të kryer regjistrimin, qytetarët duhet të paraqesin dokumentin e banesës, fotokopjen e kartave të idenditetit dhe leja e banimit transferohet menjëherë pasi shërbimi është online.
