Instituti për Hulumtimin e Krimeve të Luftës prezantoi në Bibliotekën Kombëtare “Pjetër Bogdani” në Prishtnë, tre monografi ku dokumentohen krimet serbe në Kosovë ndaj popullsisë, trashëgimisë e arkivave.
Drejtuesit e institutit kanë apeluar për fuqizimin me dëshmi për të zbardhur të vërtetën mbi krimet serbe në Kosovë.
Në këtë promovim sërish është përmendur padia për gjenocid ndaj Serbisë.
Anëtari i Institutit, Ismet Salihu ka përgëzuar autorët për librat e tyre, dhe ka shfrytëzuar rastin për të përmendur rëndësinë e punës së Institutit, që funksionon si njësi e Ministrisë së Drejtësisë, duke apeluar për fuqizimin e tij.
Nga anën tjetër, zv/ministri i Drejtësisë, Munir Basha, ka thënë se Kosova do të shqyrtojë të gjithë mekanizmat e mundshëm, për dënimin e fajtorëve dhe kompensimin e dëmeve të shkaktuara, derisa ka përmendur edhe padinë për gjenocid për shtetin e Serbisë. Librat e promovuar me këtë rast janë;
“Trashëgimia e shkatërruar në Kosovë – 1998-1999” e autorit Fejaz Drançolli, “Kundër Harresës – Gjenocidi i Serbisë në Kosovë 1998-1999” e autores Fitnete Ramosaj si dhe “Plaçkitja dhe Shkatërrimi i Fondit Arkivor të Kosovës nga Serbia, para dhe gjatë luftës” e autorit Baki Svirca.
