Mjeku Ilir Alimehmeti do të dorëzojë sot kandidaturën për t’u futur në garë në primaret e Rithemelimit. Alimehmeti do të jetë në këtë garë përballë deputetit Belind Këlliçi dhe ish-deputetit Gert Bogdani.
Alimehmeti do të kandidojë në primaret që do të organizojë Partia Demokratike në Tiranë, për zgjedhjet lokale që zhvillohen vitin e ardhshëm.
Alimehmeti është kandidati i tretë që shpall kandidaturën për primaret që do të zhvillohen nga PD në Tiranë. Më herët kanë prezantuar kandidaturat e tyre Belind Këlliçi dhe Gert Bogdani.
Secili prej tyre kërkon të marrë besimin në selinë blu, dhe fituesi do të kandidojë në zgjedhjet lokale për Bashkinë e Tiranës.
Fituesi i primareve në Tiranë do të jetë kandidati i i Rithemelimit dhe Partisë së Lirisë, përballë kryebashkiakut akutal Erion Veliaj në garën e 14 majit.
Rithemelimi ka vendosur që afati për regjistrimin e kandidatëve për primaret të jetë data 6 nëntor, ora 20:00.
Më datë 13 nëntor pritet të bëhet prezantimi i kandidaturave dhe data 4 dhjetor do të jetë ajo e mbajtjes së primareve në të gjitha Bashkitë, përveç Tiranës, Elbasanit dhe Durrësit, procesi në të cilat pritet të mbyllet brenda nëntorit.
