Kombëtarja Italiane pas disa muajsh pritje, më në fund ka zyrtarizuar Roberto Mancinin si trajner në stolin e të kaltërve. 53-vjeçarin e pret një aventurë e re dhe një punë mjaft e vështirë duke parë gjendjen në të cilën ndodhet ekipi pas dështimit në eliminatoret e Botërorit të Rusisë. Kontrata e firmosur ditën e hënë parashikon angazhimin e tij deri në vitin 2020 me një pagë prej 2 milionë eurosh neto në sezon plus bonusin prej 1 milionë eurosh në rast të arritjes së objektivave.
28 maji do të jetë edhe ndeshja e parë e Mancinit në stolin e Italisë, ku sprovën e parë do ta ketë me Arabinë Saudite. “Jam i emocionuar për këtë detyrë të re, të jesh trajner i Kombëtares nuk është diçka që ndodh shpesh. E pata shumë të lehtë të zgjidhja. Falënderoj të gjithë trajnerët që kanë punuar me mua duke kontribuar në rritjen time profesionale. Jam në rolin e trajnerit prej shumë vitesh dhe mendoj se ky ishte çasti i duhur për të marrë një përgjegjësi të madhe si kjo. Italia jashtë Botërorit ishte diçka shumë e hidhur për të gjithë ndaj dëshiroj të jap kontributin tim për këtë përfaqësuese.
I pyetur për afrimet që ka ndërmend të bëjë, konkretisht rreth emrave që janë lakuar si Balotelli dhe Pirlon si pjesë të stafit, Mancini u shpreh se do të dëshironte shumë ta rishihte Mario Balotelin edhe njëherë në formën e tij më të mirë me fanellën e përfaqësueses. Sikundër pritet edhe afrimi i Pirlos si pjesë e stafit.
“Qëllimi im është një dhe i vetëm, të ringre këtë Kombëtare në majën e futbollit europian. Dua që të jem pikërisht njeriu që e rindërtoi dhe e solli sërish këtë skuadër me histori në nivelet më të larta të futbollit botëror. Italia e ka fituar katër herë Kupën e Botës dhe sot ky ekip ka në strukturë lojtarë me peshë dhe bashkë mund t’ia dalim të ringihemi aty ku meritojë”. Në rast se Mancini do të arrijë kualifikimin në Euro 2020 me këtë përfaqësuese automatikisht kontrata e tij do të rinovohet edhe me dy vite tjerë.
